О́ziniń kirispe sózinde «Ýaqyp» qaıyrymdylyq qorynyń baǵyttaryn aıtqan Din isteri jáne azamattyq qoǵam mınıstri Nurlan Ermekbaev saýapty is jasaýǵa talpynǵandar kóbine meshit salyp berýmen shekteletinin jetkizdi. Onyń pikirinshe, mektep, aýrýhana, jol, kópir salý sekildi halyq ıgiligi úshin jasalatyn jumystardy saýapty iske jatqyzýǵa bolady.
«Saýap úshin adamdar óz erkimen aqshalaı nemese múlikteı qaıyrymdylyq jasaı alady. Biraq munyń bári órkenıetti úlgide jáne qoǵamǵa tıimdi bolýy tıis. Osy oraıda, qoly ashyq, kókiregi oıaý Atymtaı jomarttarǵa búkil múmkinshilik jasap berý qajettigi týyndaıdy. Qordy qurýdaǵy basty maqsat ta osy», – dedi Nurlan Ermekbaev.
Mınıstrdiń aıtýynsha, «Ýaqyp» qaıyrymdylyq qory ózdiginen tabys tabýmen de aınalysady. Ol úshin «Ýaqyp» qarjy aktıvterimen, jyljıtyn jáne jyljymaıtyn múlik saýdasymen aınalysady. QMDB naıb múftıi Naýryzbaı qajy Taǵanulynyń sózine súıensek, qor jumysy kezinde «paıyz» máselesiniń aralasyp ketýin baqylaıtyn arnaıy top bar. Olar qor tóralqasyna keńes berip, usynystaryn bildirip otyrady.
Sonymen qatar, «Ýaqyp» qaıyrymdylyq qory eldegi tatýlyq pen turaqtylyqty qamtamasyz etý baǵytynda da jumys atqaryp, mańyzdy áleýmettik salalardy iske asyra otyryp, din salasyndaǵy ózekti problemalardy sheshýge atsalysady.
«Qor áleýmettik jaǵynan az qamtylǵan jáne múmkindigi shekteýli azamattarǵa kómek kórsetedi. Sondaı-aq, dinı qyzmetkerlerdiń jalaqysy memleketten bólinbeıtini málim. Olardyń eńbekaqysy qaıyrymdylyqtan túsetin qarjyǵa tikeleı baılanysty», – degen Naýryzbaı qajy shalǵaı aýyldarǵa bilimdi ımam aparýdyń qıyndyǵyn da tilge tıek etti.
Naıb múftı qor jumysy atalǵan olqylyqtyń ornyn toltyryp, oń sheshim qabyldaýǵa úles qosatynyna senim bildirdi. Naýryzbaı qajy Taǵanulynyń aqparatyna súıensek, búgingi tańda Qazaqstandaǵy 2500-ge jýyq meshittiń 500-deıi ǵana QMDB tarapynan qarjylaı qoldaý kórip otyr. Qalǵan ǵıbadat úıleri jeke kásipkerlerdiń demeýshiligine muqtaj.
Din isteri jáne azamattyq qoǵam mınıstri Nurlan Ermekbaev ta bul derekterdi rastap otyr. Onyń málimetinshe aýyldyq jerlerde ımamdardyń jalaqysy 20-30 myń teńge aralyǵynda. Al aýdandyq jerde din jolynda qyzmet etetinder 40-50 myń teńge eńbekaqy alatyn kórinedi. Nurlan Ermekbaev shalǵaı jerlerde ımamdarǵa jalaqy tóleý birizdilikke túspegenin, júıesiz júrgiziletinin málimdedi.
Brıfıngte dinı radıkalızm men ekstremızmniń aldyn alý máselesi de sóz boldy. Nurlan Ermekbaevtyń pikirinshe, bul olqylyqty joıý úshin ımamdardyń biliktiligi joǵary bolýy tıis. «Ýaqyp» qorynyń qurylyp, shalǵaı aımaqtaǵy dinı qyzmetkerlerge qarjylaı qoldaý kórsetýi ımamdardyń deńgeıin arttyryp, ekstremızmmen kúresýge jaǵdaı jasaıdy.
Sondaı-aq, naıb múftı sadaqa jáshikterine túsetin qarajatqa da toqtaldy. Onyń aıtýynsha, sadaqany esepteıtin 10 adamnan turatyn arnaıy top bar. Olar túsken qarjyny sanap, bir tıynyn qaldyrmaı múftııattyń banktegi shotyna aýdarady. Sodan keıin ǵana ımamdardyń jalaqysy, meshitterge qajetti shyǵyndarǵa aqsha bólinedi. «Jyl saıyn Dinı basqarma qarjylyq esep berip otyrady. Búkil jumys ashyq túrde júrgiziledi. Qalaǵan adam múftııattan sadaqaǵa qatysty málimetti alýyna múmkindik bar», – dedi Naýryzbaı Taǵanuly.
«Ýaqyp» korporatıvtik qaıyrymdylyq qory 2017 jyldyń mamyrynda qurylǵan bolatyn. Onyń qyzmetine áleýmettik jobalardy qarjylandyrý, bilim jáne aǵartýshylyq sharalaryn júrgizý, dinı birlestik qyzmetkerleri men dinı mekemeler qyzmetin qoldaý kiredi. «Ýaqyptyń» prezıdenti Qaırat Aıtbaı qordyń bir dinge basymdyq bermeıtinin, Qazaqstanda resmı tirkeýden ótken kez kelgen dinı birlestiktiń jumysyna qoldaý kórsetýge ázir ekenin jetkizdi.
Abaı ASANKELDIULY,
«Egemen Qazaqstan»
