Bul týraly Astana ákimdiginde ótken baspasóz máslıhatynda «AstanaLRT» JShS basqarma basshysynyń kólik jónindegi orynbasary Rýstam Halılev málim etti.
«Biz avtokóliktiń nómirlik tańbalaryn tanıtyn tehnologııany iske qosyp jatyrmyz. Áýejaıǵa jıi keletin avtokólik, ıaǵnı zańsyz tasymaldaýshy avtoturaqtyń alǵashqy tegin 30 mınýtyn paıdalana almaıdy. Áýejaıǵa 30 mınýt saıyn qaıta kelgen avtokóliktiń nómiri nazarǵa ilinedi jáne kólik júrgizýshisinen buǵan deıingi turǵan ýaqyty úshin tólem alynady. Bul zańsyz tasymaldaýshylardan qutylýǵa múmkindik beretin arnaıy shara. Qazirgi ýaqytta bul shara tehnıkalyq turǵyda engizilip, testileýden ótip jatyr», dedi Rýstam Halılev.
Eske sala ketsek, «AstanaLRT» JShS ókilderi «Nursultan Nazarbaev» áýejaıy aýmaǵyndaǵy avtoturaq baǵasynyń qymbattyǵyna qatysty túsinikteme berdi. Ondaǵy tarıfke sáıkes, áýejaı mańyndaǵy qysqa merzimdi avtoturaqta 30 mınýt tegin turýǵa bolady, bir saǵatqa - 300 teńge, kelesi saǵat úshin - 400 teńge, odan keıingi saǵattarǵa 1500 teńgeden tólenýi tıis. Odan bólek, áýejaı mańynda 266 oryndyq aqyly jabyq parkıng ornalasqan. Onda táýligine 2 myń teńge tólep, kólikterdi uzaq merzimge qaldyrýǵa bolady.
