«Ortalyq sóıleý qabileti buzylǵan, kóńil-kúı, emosıonaldy-kommýnıkatıvtik qabiletiniń damýy nashar, kórý jáne estý múmkinshiligi tómen 18 jasqa deıingi ul-qyzdarmen jumys isteıdi. Bir kýrs úsh aıdan bir jylǵa deıin sozylady», deıdi M. Jumabaev aýdandyq psıhologııalyq-pedagogıkalyq túzetý kabınetiniń dırektory Dınara Sádýaqasova.
Psıholog Saıda Vladıýktiń aıtýynsha balalardyń minez-qulqy árqıly bolǵandyqtan, túrlishe amal-tásilder jasalynady. Ol neıropsıhologııalyq jáne Montessorı elementterin qoldanatyn kórinedi.
Segiz kabınettiń barlyǵy oıynshyqtarmen jáne kerekti quraldarmen tolyq jabdyqtalǵan. Munda sportpen de shuǵyldanýǵa bolady. Eń kishkentaı kelýshiler qurǵaq basseınde jatyp shynyqsa, eresekter jaǵy arnaıy qurylǵynyń kómegimen dene kúshterin, bulshyq etterin jattyqtyrady.
Sońǵy bir aıda mamandardyń qyzmetine 40-qa jýyq ul-qyz júgingen. Eki bala dertine shıpa tapsa, segiziniń densaýlyǵy jaqsara túsken.
О́mir ESQALI,
«Egemen Qazaqstan»
