Ermek aǵamyzdy aýyzǵa alsaq, marqumnyń ózin ǵana eske almaı, Serkebaevtar áýletin túgendep ketetin ádetimiz bar. Almas Serkebaev, Baıǵalı Serkebaev syndy biri kompozıtor, biri mýzykant uldary men jazýshy qyzy Irına Serkebaeva, inisi Murat Serkebaev, onyń skrıpkashy qyzy Jámıla Serkebaeva osy úlken áýlettiń maqtanyshyna aınalǵan jandar. Ákesin eske alý keshine Máskeýde turatyn uly, ataqty «A’Stýdıo» tobynyń prodıýseri Baıǵalı Serkebaev qatysty.
Konserttiń ashylý saltanatynda sahnaǵa kóterilgen Baıǵalı Serkebaev óz sózinde konsertke Metropolıten, La Skala, Marııa teatrlarynyń kórermenderin tánti etken áıgili ártisterdiń qatysyp jatqanyn, bul ákesine kórsetilgen úlken qurmet ekenin aıtsa, Mádenıet jáne sport mınıstri Arystanbek Muhamedıuly 1967 jyly Kanadada ótken dúnıejúzilik kórme aıasynda Ermek Serkebaevtyń Qazaqstan dańqyn asqaqtatqanyn málimdedi. «Bizdiń ataqty Er aǵamyz – Ermek Serkebaev Monrealda elimizdiń ónerin álemge tanytyp edi. Endi, mine, araǵa 50 jyl salyp biz EKSPO halyqaralyq kórmesi aıasynda Ermek Serkebaevty eske alý keshin ótkizip otyrmyz», dedi ol.
Barqyt úndi barıton daýystyń ıesi, KSRO halyq ártisi, Memlekettik syılyqtyń ıegeri, Sosıalıstik Eńbek Eri, ulaǵatty ustaz Ermek Serkebaevty eske alýǵa arnalǵan keshte álemniń úzdik bas daýys ıesi, Gremmı syılyǵynyń eki dúrkin ıegeri, Metropolıten-opera, Marııa teatry jáne Parıj operasynyń solısi Ildar Abdrazakov, Marııa teatrynyń solısi, Opera Awards syılyǵynyń laýreaty Asmık Grıgorıan, Máskeýdegi Úlken teatrdyń jetekshi solısteri Igor Golovatenko men Agýnda Kýlaeva, Marııa teatrynyń solısi Sergeı Skorohodov syndy sańlaqtar sahnaǵa shyqty. Sondaı-aq, óz elimizden «Astana Opera» teatrynyń solısteri Súndet Baıǵojın, Azamat Jyltyrkózov, Saltanat Ahmetova syndy tanymal ónerpazdar án shyrqady.
Bul keshte álemdik opera klassıkasynyń jaýharlary Dj. Rossını, Dj. Verdı, J.Bıze, Dj. Pýchchını, A.Jubanov, L.Hamıdı operalarynan arııalar aıtyldy. Reseıdiń eńbek sińirgen ártisi, Tatarstannyń halyq ártisi Renat Salavatovtyń jetekshiligimen «Astana Opera» teatrynyń sımfonııalyq orkestri ánshilerdi súıemeldedi.
Konsertke Ermek Serkebaevpen jeke tanys bolǵan áıgili kıno, óner, opera qaıratkerleriniń de qatysqanyn aıta ketken jón. Beınemonıtorda Lev Leshenko, Armen Djıgarhanıan, Bıbigúl Tólegenova, Iosıf Kobzon, Tamara Sınıavskaıalar ataqty ánshiniń sırek talanty jaıynda sóz etti.
Aıgúl SEIIL,
«Egemen Qazaqstan»
