A.Esimov Nursultan Nazarbaevqa kórme men pavılondarǵa kelýshiler sany týraly málimdedi.
– Kórmege úsh aıda 2 mıllıon adamnyń kelýi josparlanǵan bolatyn. Búginde kelýshiler sany 2,5 mıllıonnan asty. Halyqaralyq pavılondarǵa 5 mıllıonnan astam adamnyń kelýi kózdelgen bolsa, qazir olardy 20 mıllıonǵa jýyq adam aralap kórgen. Kelýshiler úshin eń tanymal pavılon – «Nur Álem» sferasy. Oǵan 831 myń týrıst kelgen. Kórme sońyna deıin bul kórsetkish 1 mıllıonnan asady dep josparlanyp otyr. «EKSPO-2017» kórmesi ashylǵannan beri 68 eldiń ulttyq kúnderi ótti. Sondaı-aq, kórmege 106 mártebeli meıman keldi, atap aıtqanda, 19 memleket basshysy, 16 premer-mınıstr jáne olardyń orynbasarlary, 11 parlament jetekshisi jáne olardyń orynbasarlary, 60 mınıstr jáne olardyń orynbasarlary bar. Shet memleketter ózderiniń pavılondaryn ázirleýge 100 mıllıon dollarǵa jýyq qarajat jumsady, – dedi Astana EKSPO-2017» ulttyq kompanııasy» AQ basqarmasynyń tóraǵasy.
Sonymen birge, Elbasyǵa týrızm salasyndaǵy kórsetkishterdiń aıtarlyqtaı ósip kele jatqany jóninde baıandaldy. A.Esimovtiń málimetine sáıkes, Astana qalasyndaǵy qonaq úıler men hostelder sany 27%-ǵa ósken. Olarǵa qonaqtardy ornalastyrý kórsetkishi 60%-dy qurap otyr.
Memleket basshysy halyqaralyq kórmeni ótkizý elordany jáne jalpy el ekonomıkasyn damytýǵa mýltıplıkatıvtik oń áser beretinin erekshe atap ótti.
– «EKSPO» kórmesi ekonomıkanyń barlyq sektorynyń damýyna serpin berýde. Qonaq úıler men kópshilik tamaqtanatyn oryndarda týrıster sany artty. Sol sebepti elorda bıýdjetine qosymsha qarajat túsip otyr. Jańa jumys oryndary ashyldy. Qazaqstannyń 196 kompanııasy kórme kesheniniń qurylysyna qatysty. Bul 200 myńǵa jýyq adamdy qamtydy. Qazir kórme qyzmetin qamtamasyz etetin 21 myńdaı adam jumys isteýde, – dedi Qazaqstan Prezıdenti.
Kezdesý barysynda «Astana EKSPO-2017» ulttyq kompanııasy» AQ basqarmasynyń tóraǵasy kórmeni daıyndaýǵa jáne ótkizýge bólingen qarajattyń únemdelýi jóninde málimet berdi. A.Esimovtiń aqparaty boıynsha, tehnıkalyq-ekonomıkalyq negizdemege sáıkes qurylysqa 816 mlrd teńge qarastyrylǵan. Keıinnen bul qarajat ońtaılandyrý esebinen 452 mlrd teńgege azaıtyldy.
Budan bólek, Nursultan Nazarbaevqa kórme jumysy aıaqtalǵannan keıin onyń nysandaryn paıdalaný jóninde usynystar aıtyldy. Kórme aýmaǵyna «Astana» halyqaralyq qarjy ortalyǵyn, IT-startaptar parkin ornalastyryp, birqatar ortalyq pen pavılondardy EKSPO murasy retinde saqtap qalý kózdelip otyr.
Kezdesý sońynda Elbasy «Astana EKSPO-2017» ulttyq kompanııasy» AQ basqarma tóraǵasynyń jumysyn laıyqty baǵalap, birqatar naqty tapsyrma berdi.
