Qoǵamdaǵy ózekti taqyrypqa qozǵaý salǵan týyndy jastarǵa oı tastaıdy. Otbasylyq ómirdiń máni nede degen suraqqa jaýap izdeıdi. Dostarymen bas qosyp, ázil qaljyńy jarasqan toptyń ishinen Saǵym men Nurgúldiń kenetten urysa ketkenin baıqaısyz. Sol kúni Nurgúldiń týǵan kúni edi. Alaıda, ashy sýǵa sylqııa toıyp alǵan Saǵymnyń esinen bul kún tars shyǵyp ketedi. Bar másele qalta telefonda edi. Kim soqty telefondy, degen kúıeýiniń sózine jaýap bermegen áıeliniń teris qylyǵy eriniń namysyna tıip, odan ári shıelenisti ýshyqtyra túsedi. Qyzǵanysh degen qyzyl ottan shańyraqtyń shyrqy buzylyp, aspan aınalyp jerge túskendeı bolady. Baılyq pen dańqqa mastanyp, jurtty aýzyna qaratqysy kelgen Saǵymǵa kórshi qarııa aǵalyq aqylyn aıtyp, sabyrǵa shaqyrady. Bes kúndik jalǵan ómirde syılastyqpen, adamgershilik qasıetti aıaqqa taptamaı ótkizgenge ne jetsin shirkin! Desek te bolmashy nársege shańyraǵy shaıqalyp, eki jaqqa aıyrylysyp jatatyn jastar qanshama? Avtor ekinshi jaqtan parallel kartınany qosa sýretteıdi. Onda joldasynyń qyzǵanyshynan mezi bolǵan áıeldiń sol bir balalyq shaqty, alǵashqy sezimdi, ótken kúnge degen saǵynyshqa toly jyldardy ańsaýy shyǵarmanyń ón boıynan kirshiksiz tazalyqty elestetedi. Úıinen ketip qalǵan Nurgúl jol boıynan Tańat esimdi jigitti jolyqtyrady. Tańat pen Nurgúl bir birine ǵashyq bolyp, essiz sezimniń eteginde júredi, alaıda Nurgúl bul oıynnan bas tartady. Sen jassyń, bolashaǵyń áli alda, men seniń tup tunyq ómirińdi laılaǵym kelmeıdi, dep odan at izin sýytady. Bozbalanyń otbasyly áıelge ǵashyq bolýyn kórsete otyryp avtor, jigitti anasynan ana súti ketpegen sábıdeı ańǵal, aqkóńil, jamandyq ataýlyǵa qarsy, adamnyń bárin jaqsy kóretin marsıanaǵa teńestiredi.
Osy oraıda basty róldi somdaǵan Aınur Rahıpovanyń da pikirin bildik. –Shyǵarmadaǵy negizgi oı adamdardyń bir-birin baǵalaı bilýi. Adamı qundylyqtyń, adamı qarym qatynastyń joǵary deńgeıde turýy erli-zaıyptylar arasynda sezim qylyn úzip almaýdy maqsat tutady. Adamnyń eń alǵashqy sezimi tazalyqty ańsaıtyn, eń názik lırıkaǵa qurylǵan týyndy.
−Almatydaǵy Ǵ.Músirepov teatryna 70 jyldyń basynda akter bolyp kelgenmin. Bul Nurlan Orazalınniń eń alǵashqy dramalyq shyǵarmasy bolatyn. Bul shyǵarma alǵash ret 1972−73 jyly sahnalandy. Sol jerde Tańattyń rólin men oınaǵan bolatynmyn. Sol jyldary qazaq teatrynda rezonans týdyrǵan, úlken anshlagpen ótken spektakldiń biri boldy. Tipti 9-10 jylǵa deıin sahna tórinen túsken joq. Astana Jastar teatrynda júrip jatqanyna da 4 jyldaı ýaqyt boldy. О́zgesheligi qazirgi kózqarasqa jaqyn, burynǵy formattaǵy tekstterdi alyp tastadyq, adamı tartystarda ǵana qaldy. Dekorasııa jaǵynan da túrlenip, qazirgi zaman talabyna saı jańasha usyndyq, kórermen jyly qabyldady dep oılaımyn − deıdi, rejısser Nurqanat Jaqypbaı.
Sahnada kúıeýi Saǵymdy – Azamat Esqulov, Nurgúldi – Aınur Rahıpova, Tańatty – Erbol Tileýkenov, kórshini – Beıbit Qusanbaev, Monterdi – Bekjan Kerimbaev, aýla sypyrýshyny – Altynaı Nurbek, Santaıdy – Aıman Esenqyzy sátti oınap shyqty. Shyǵarmanyń qoıýshy rejısseri Nurqanat Jaqypbaı.
Aıman Muqysheva
