«Almaty sý Holdıngi» MQK-niń habarlaýynsha, shynyplastıkalyq qolǵappen sanasııa ádisi arqyly qubyrlardy qaıta qalpyna keltirý tásili qoldanystaǵy sý qubyrlary men kárizderdi qaıta jasaýdyń zamanaýı tehnologııasy sanalady. Jóndeý jumystaryn jerdi qazyp áýrege túspesten jańa tehnologııa arqyly júzege asyryp, qubyrlardyń qyzmetin 50 jylǵa uzartýǵa bolatyn bul ádis jerdi qazý, qaıta jabý sııaqty jumys barysyn eki esege qysqartaatyn bolady.
«Almaty sý Holdıngi» ókilderimen Almatyda ótken kezdesýde Máskeý qalasynyń «Mosvodstok» MBK bas dırektorynyń orynbasary Vladımır Iаvorskıı sońǵy eki jyl ishinde atalǵan ádis boıynsha 45 shaqyrymǵa sozylatyn túrli dıametrli sý qubyrynyń qalpyna keltirilgenin aıtty. «Jańa tehnologııa boıynsha jumys isteý tıimdi ári arzanǵa túsip tur, onyń ústine, Máskeýde jer asty kommýnıkasııalarynyń kóptiginen qazý jumystaryn júrgizý múmkin emes. Sondyqtan jańa tehnologııa jerdi qazbaı-aq, turǵyndarǵa esh kedergi keltirmeı-aq jumys isteýge múmkindik beredi. Ondaı jumystardy bir túnniń ishinde atqarýǵa bolady», – deı kele, V.Iаvorskıı qazirgi kezde Máskeýdegi 70 paıyzdan astam sý qubyrynyń eskirgenin, buryn «Mosvodostok» júıesi jyl saıyn alyp megapolıstegi sý qubyrynyń 10 paıyzyn ǵana retke keltirse, bıyl jańa tehnologııa arqyly qubyrlardyń 25-30 paıyzynyń jańartylǵanyn atap ótti.
«Almaty sý Holdınginiń» habarlaýynsha, Almatyda sý qubyryn jańartýdyń bul ádisi sýdan ajyratý jelilerinde qoldanylǵan eken. Sý qubyrlaryn laıner arqyly qaıta jańartýǵa múmkindik beretin jańa tehnologııada aýyz sýmen qamtamasyz etýde zııandy dep tanylǵan «stırol» (C₈H₈) qoldanylmaıtynyn da aıta ketý kerek.
Atap óterlik jaıt, bıyl Almaty shaharynda 57 km aryq jelileri, 146 km jol jóndelip, 97 myń sharshy m trotýar abattandyrylsa, 32 km jylý júıesi jańartylǵan. Bul ótken jylmen salystyrǵanda 2,7 ese kóp kórsetkish. Sonymen qatar, bıyl qala aýmaǵyndaǵy «Aıgerim», «Uljan – 1, 2», «Qarasý», «Aqbulaq», «Darhan», «Qurylysshy», «О́jet», «Trýdovık», «Shańyraq – 1, 2», «Altyn Besik», «Dostyq» sııaqty birqatar yqsham aýdandarda 20 myńnan astam úıge 380 km sý jáne káriz qubyrlary tartylýda.
Mıra BAIBEK,
«Egemen Qazaqstan»
ALMATY
