Ereımentaý stansııasyna aıaldaǵan poıyz osynda eki kún boldy. «Salamatty Qazaqstan» poıyzynyń basshysy, tis dárigeri Marjan Múkpenovanyń aıtýynsha, brıgada quramynda 25 birinshi jáne joǵary sanatty dárigerler bar.
«Dárigerge qaralýǵa nıet bildirgen, tipti kómekke zárý qala men aýyl turǵyndarynyń bárine áriptesterdiń qyzmeti qoljetimdi boldy», - deıdi Marjan Múkpenova.
Medısına poıyzyna segiz vagon tirkelipti. Onda kópsalaly keńesshilik-dıagnostıkalyq kómek kórsetýge jáne ózge de múmkindikter qarastyrylǵan. Dárigerler tegin qyzmet kórsetti. Poıyzda gınekolog, terapevt, nevropatolog, kardıolog, otashy, oftalmolog, pedıatr, tis dárigeri, rentgenolog jáne ózge sala ókilderi jumys istedi. Dárigerdiń qabyldaýyna qosa jol boıy birqatar dıagnostıkalyq sharalar atqaryldy. Mamandarǵa júgingen naýqastardyń ish qurylysy ýltrasáýle ádisimen zertteldi, rentgenologııalyq tekseris, klınıkalyq-bıohımııalyq saraptama júrgizildi.
Jyljymaly quram zamanaýı jabdyqpen de jaraqtandyrylypty, shuǵyl keńes berý úshin kez kelgen klınıkamen, ınstıtýtpen baılanysqa shyǵýǵa múmkindik qarastyrylǵan.
Medısına mamandaryna qajetti jaǵdaıdyń bári oılastyrylǵan. Vagonda ǵalamtor, dýsh kabınasy, telefon, teledıdar, dızeldi generator, bári-bári barshylyq. Dámhanada tórt mezgil tamaq qarastyrylǵan.
Odan ári «Salamatty Qazaqstan» poıyzy irili-usaqty stansııalardy baǵytqa alyp, ári qaraı saparyn jalǵastyrady. Máselen, bir ǵana Torǵaı stansasynda 96 adam, onyń ishinde 5 bala joǵary bilikti mamandarǵa qaraldy.
