Elimizde ótip jatqan álemdik kórme talaı óner ıeleriniń shyǵarmashylyǵyn shyńdap, ónerin óristetýge zor yqpalyn tıgizýde. Kórme aıasynda ótetin festıval bul sózimizdiń anyq dáleli bola alady. Sebebi, jas rejısserler – qazaq teatrynyń erteńi. Ulttyq sahna óneriniń keńge qanat jaıyp, tereńge tamyr jiberýi de jas talanttardyń izdenisi men umtylysynan bastaý alatyny shyndyq. Atalmysh óner merekesinde jas rejısserlerdiń arnaıy sheberlik saǵattarynan ótip, rýhanı nár alyp, dúnıetanymdarynyń ózgerip, ónerde ózgeshe jol, baǵyt baǵdar alýyna mol múmkindik jasalǵan.
– Forým-festıval jas teatr rejısserleriniń shyǵarmashylyǵyna jol ashyp, qazaq rejıssýrasyn jańa esimdermen tolyqtyrýdy, sonymen qatar jas jáne tanymal teatr rejısserlerine pikirtalastar, leksııalar, sheberlik-synyptary, semınarlar baǵdarlamalary arqyly bilim jáne kommýnıkasııa alańyn jasap, otandyq rejıssýra óneriniń órisin keńeıtýge múmkindik týǵyzady. Sondaı-aq, qazaqtyń jańashyl teatr rejısseri Qaırat Súgirbekovtyń esimin este qaldyrý maqsatynda uıymdastyrylyp otyr. Sharanyń basty maqsaty talantty rejısserler shyǵarmashylyǵyna qoǵam men qalyń kópshiliktiń nazaryn aýdarý – deıdi sharany uıymdastyrýshylar.
Forým-festıvalge elimizdegi 20 men 40 jas aralyǵyndaǵy jas rejısserler qatysady. Olardyń sapynda Elik Nursultan, Dına Qunanbaıqyzy, Dáýren Sergazın, Rústem Janyamanov, Bolat Abdrahmanov, Farhad Moldaǵalıev, Juldyzbek Jumanbaı, Gúlnáz Qamysbaeva, Meıram Habıbýllın, Aıdyn Salbanov syndy esimi kópke tanylyp qalǵan jas rejısserler de bar. Elorda turǵyndary men qonaqtary alty kún boıy elimizdiń ár óńirinen kelgen tanymal teatrlardyń kórermen yqylasyna bólengen tańdaýly qoıylymdaryn qyrkúıektiń 2-8 aralyǵynda tamashalaı alady. M. Áýezov atyndaǵy Qazaq Memlekettik akademııalyq drama teatry, Ǵ. Músirepov atyndaǵy balalar men jasóspirimder teatry, Respýblıkalyq akademııalyq nemis drama teatry, Astana Jastar teatry, Aqtóbe oblystyq Alaqaı teatry, S. Muqanov atyndaǵy Soltústik Qazaqstan oblystyq Jastar teatry, A. I teatry, J. Shanın atyndaǵy oblystyq akademııalyq qazaq drama teatry, Almaty qalasy memlekettik qýyrshaq teatry, Atyraý oblystyq Mahambet О́temisuly atyndaǵy qazaq drama teatry festıvalidiń kórkin qyzdyryp óz ónerlerin usynatyn bolady.
Qııalǵa qanat bitirip, arman men sezim tuńǵıyǵyna jeteleıtin tyń týyndylar kóbeıip jatsa nur ústine nur. Atalǵan forým-festıval – bolashaq rejıssýra sańlaqtarynyń qalyptasýyna sebepker bolady degen senimdemiz.
Arman OKTIаBR,
«Egemen Qazaqstan»
ALMATY
