Bul «Rýhanı qazyna», «Tárbıe jáne bilim», «Atameken», «Aqparat tolqyny» atty 4 ishki baǵdarlama boıynsha 61 jobadan quralady. О́ńirlik baǵdarlamanyń jalpy bıýdjeti 28 mlrd. teńgeni qurasa, bıyl bul jobalarǵa 7 mlrd. teńge baǵyttalyp otyr. Búgin Qazaqstan Respýblıkasy Prezıdenti janyndaǵy Qoǵamdyq sanany jańǵyrtý jónindegi Ulttyq komıssııanyń úshinshi otyrysynda sóz sóılegen Shyǵys Qazaqstan oblysynyń ákimi Danıal Ahmetov osylaı dedi.
Oblys ákiminiń aıtýynsha, óńirde «Rýhanı jańǵyrýdyń» basty baǵyttary boıynsha maqsatty jáne josparly sharalar qolǵa alynǵan jáne «Rýhanı jańǵyrý» jobalyq keńsesi qurylǵan. Atalǵan úderiske S.Amanjolov atyndaǵy ShQMÝ, D.Serikbaev atyndaǵy ShQMTÝ, Shákárim atyndaǵy SMÝ jáne Qazaqstan halqy Assambleıasy, Qoǵamdyq keńes pen qoǵamdyq uıymdar tartylǵan.
Bul baǵdarlama aıasynda úsh tildi bilim berýdi damytý, arheologııa salasyndaǵy ǵylymı-zertteý jumystary, ishki týrısterdiń aǵymyn arttyrý kózdelip otyr. «Rýhanı qazyna» ishki baǵdarlamasy sheńberinde 19 óńirlik joba júzege asyrylady. Atap aıtqanda, «Shyǵys Qazaqstannyń órkenıet qubylystary» negizgi bazalyq jobalardyń biri retinde óńirdiń biregeı tarıhı-mádenı keshenin biriktirmek jáne «Kóne qazyna», «Shyǵys Qazaqstan injý-marjany» ishki jobalarynyń da basyn qosady. «Kóne qazyna» aıasynda Berel, Shilikti, Ablaıkıt keshenderindegi arheologııalyq qazba jumystary men ǵylymı-zertteý jumystary jalǵasyn tabady. Qońyráýlıe men Yrǵyzbaı ata kesenesine ınfraqurylym jelileri salynyp, Shilikti keshenine áınekten arnaıy sarkofag turǵyzylady, «Tarhan geologııalyq qıyǵy» ashyq aspan astyndaǵy mýzeıi ashylady. Barlyq jádigerlerdi О́skemende boı kóteretin arheologııa jáne zamanaýı óner mýzeıine qoıý josparlanyp otyr.
Al týrızmdi damytý men muralardyń tanymaldylyǵyn arttyrýǵa negizdelgen «Shyǵys Qazaqstan injý-marjany» ishki baǵdarlamasy aıasynda kıeli oryndar kartasy jasalyp, týrıstik ınfraqurylymdar keńeıedi, sý qoımalarynyń emdik qasıeti zertteledi. Sonymen birge «Rýhanı qazyna» «Abaı álemi» kitap serııasyn shyǵarý, mýzeı qoryn sandyq júıege kóshirý, «Mádenı kod: Shyǵys Qazaqstan» arhıvi men kitaphanasyn qurý, «Mýzyka álemi», «ART Zaman» festıvalderin ótkizý, teatrlar men shyǵarmashylyq uymdardyń gastrolderin uıymdastyrý kózdelgen.
Sondaı-aq «Qazaqstannyń tabıǵaty jáne tabıǵı muralary» jobasy aıasynda kóp danamen Shyǵys Qazaqstan Atlasyn, ósimdikter men janýarlardyń Qyzyl kitabyn basyp shyǵarý josparlanyp otyr. Bul basylymdar barlyq mektepter men kolledjderge, kitaphanalarǵa túsedi. Jáne barlyq materıaldar men jobalardyń nátıjesi «Týǵan jer: Shyǵys Qazaqstan» ınternet platformasyna ornalastyrylyp, barshaǵa qoljetimdi bolady.
Dýman Anash
«Egemen Qazaqstan»
Sýretti túsirgen
Orynbaı BALMURAT
«Egemen Qazaqstan»
