Kóptiń qýanyshyna ortaqtasyp, páter kiltin tabystaýǵa Almaty oblysynyń ákimi Amandyq Batalov pen «Qazaqstannyń turǵynúıqurylysjınaq banki» AQ basqarma tóraıymy Lázzat Ibragımova qatysty.
О́ńir basshysy quttyqtaý sózinde:
– Elbasynyń halyqty turǵyn úımen qamtamasyz etý týraly tapsyrmasyna sáıkes oblysta aýqymdy jumystar atqarylýda. Oblys ortalyǵy da jańa salynyp jatqan úılerdiń esebinen kúnnen kúnge kórkeıip, ósip keledi. Jańa páterge qol jetkizip otyrǵandaryńyz sonyń dáleli. Aldaǵy ýaqytta da halyqty baspanamen qamtamasyz etý jumystary júıeli atqarylatyn bolady, – dep sendirdi.
Sońǵy jyldary Turǵyn úı qurylys jınaq bankine degen senim artqan. Joǵaryda aıtqan 43 myń salymshy sonyń dáleli. Olardyń 20 myńy oblys ortalyǵynda tursa, qalǵandary eldi meken turǵyndary. Lázzat Ibragımovanyń aıtýynsha, bul – ózgelerge úlgi bolarlyq kórsetkish. Al Qazaqstannyń «turǵynúıqurylysjınaqbanki» AQ oblystyq fılıalynyń dırektory Ǵalymjan Shalǵynbaevtyń sózine júginsek, «Salymshylardyń deni dárigerler, muǵalimder, qarapaıym eńbek adamdary, memlekettik qyzmetkerler, taǵy basqa sanattaǵy azamattar. Ortasha tabys ıeleri. Soǵan qaramastan turmystan qarjy únemdep, ony banktegi esepshotyna aýdaryp, kezegi kelgende turǵyn úıge ıe bolýǵa úmitti», deıdi.
Bank búginge deıin oblys ortalyǵynda ǵana turǵyn úı salýmen aınalysyp kelse, budan bylaı «Nurly jer» baǵdarlamasy aıasynda mundaı jumystar barlyq aýdandarda qolǵa alynbaq. Bul jaıly Lázzat Ibragımova aıtty.
«Turǵynúıqurylysjınaqbanki» AQ osyǵan deıin óńirlerdi damytýdyń 2020 jylǵa deıingi baǵdarlamasyna sáıkes oblysta 74,1 myń sharshy metr turǵyn úı salǵan. Sonyń ishinde «Turǵyndardyń barlyq sanatyna arnalǵan turǵyn úı» baǵyty boıynsha 41,1 myń sharshy metrlik 12 úı (609 páter) salynsa, «Jas otbasylarǵa arnalǵan turǵyn úı» baǵyty boıynsha 33 myń sharshy metrlik 7 úı (593 páter) paıdalanýǵa berilgen. Al bıyl 6 úı salý josparlanǵan, onyń tórteýi Taldyqorǵanǵa tıesili.
Páter kilti tabystalardan bir saǵat buryn eki tarap jańa kelisimge kelgenin de aıta ketý kerek. Jańa josparda – oblys ortalyǵynda «Nurly jer» baǵdarlamasy boıynsha salynatyn eki qabatty 607 kottedjdiń qurylysy tur (onyń 48-i bıylǵy jyldyń sońyna deıin qoldanysqa beriledi). Ol úshin oblys ákimdigi 100 gektar jer bólgen. Daıyndyq jumystary júrip jatyr. Bank tarapy jetisýlyqtardyń bul bastamasyna erekshe den qoıyp, qoldaý tanytýǵa daıyn. Osy maqsatta oblystyq ákimdikte oblys ákimi Amandyq Batalov pen «Qazaqstannyń turǵyn úı qurylys jınaq banki» AQ basqarma tóraıymy Lázzat Ibragımova ekijaqty yntymaqtastyq kelisimge qol qoıdy.
Almas NÚSIP,
«Egemen Qazaqstan»
Almaty oblysy
