Almatyda týǵan, qazir Máskeýde turatyn dramatýrg Oljas Janaıdarovtyń pesalary halyqaralyq festıvaldarda júlde alyp, Reseıdiń birneshe qalasynda, Qazaqstannyń teatrlarynda qoıylyp júr. Atamekenine kelgen kezde, mundaǵy teatrlardyń, dramatýrgııanyń halimen tanysqan Oljas, endi qyrkúıek-qazan aılarynda Temirbek Júrgenov atyndaǵy ulttyq óner akademııasynyń qabyrǵasynda dramatýrgııanyń laboratorııasymen jas qalamgerlerdi tanystyrmaq. Eki aıǵa sozylatyn jumystyń aıasynda pesa jazýdy úırený, onyń teorııasyn oqý, jazý jáne akterlerge rólder boıynsha oqytý kiredi. Lermontov atyndaǵy memlekettik orys drama teatrynyń akterleri qazan aıynyń sońynda jazylǵan pesalardy oqıtyn bolady. Oljastyń kýrsynda qazir on úshin jas dramatýrg bar. Taǵy jeti jas qalamger – erkin qatysýshylar. Ulttyq óner akademısynyń rektory Bıbigúl Núsipjanovanyń aıtýynsha, bul sharanyń jas qalamgerlerge bereri mol. Bul eń aldymen tájirbıe men bilim jınaýǵa kóp yqpal etedi. «VT» teatrynyń dırektory Aıgúl Sultanbekova byltyrdan beri Oljas Janaıdarovtyń osy ıdeıasyn júzege asyrý úshin eńbektenip keledi.
Eki aı boıy jalǵasatyn ıgilikti sharanyń jemisti bolýyn tileımiz. Mundaı ıgi bastamalar bir jylmen ǵana shektelmeı, jas dramatýrgterdiń ósýine yqpal ete beredi dep oılaımyz.
Baǵashar Tursynbaıuly,
«Egemen Qazaqstan»
ALMATY
