Solardyń biri – Isataı aýdanynyń Aqqystaý selosynda ashylǵan jańa alleıa. Aýdandaǵy munaı óndirýshi «Sazanquraq» kompanııasynyń qurylǵanyna bıyl 20 jyl. Osy mereıli dataǵa oraı mekeme aýdan turǵyndaryna jaıly demalys ornyn syılap, ony «Rýhanı jańǵyrý» baǵdarlamasymen de baılanystyrdy.
Jalpy kólemi 650 sharshy metr bolatyn alleıadaǵy mármár tuǵyrǵa munaı uńǵymasynyń kóshirme maketi ornatylǵan. Kórneki bannerge aýdannyń jáne «Sazanquraq» kásiporynynyń shejireli jolynan syr shertetin fotosýretter salynǵan. Aınalasy gúlmen kómkerilip, abattandyrylǵan demalys orny aýdan turǵyndaryna kóterińki kóńil kúı syılady.
– Týǵan jerge degen perzenttik sezimdi bildirýge Elbasynyń baǵdarlamalyq maqalasy oń yqpal etkenin atap ótý kerek, – deıdi aýdan ákimi Marat Mýrzıev. – Bıznestiń áleýmettik jaýapkershiligi aıasynda da birqatar sharalar qolǵa alynyp keledi. Aldaǵy ýaqytta aýdanda «Týǵan jer» arnaıy jobasy boıynsha basqa da ıgi ister júzege asyrylady. Atap aıtsaq, Aıbas qumynda ataqty kúıshi Dına Nurpeıisovanyń kelin bolyp bosaǵa attaǵan jáne ǵumyry ótken «Shápek» obasyna belgi ornatylady. Bul jumystarǵa jergilikti kásipkerler men kásiporyndar, osy aýdannan shyqqan azamattar demeýshi bolýǵa oń yqylas tanytyp otyr.
Baqytgúl BABASh,
«Egemen Qazaqstan»
ATYRAÝ
