Bekitilgen kún tártibine oraı, depýtattar Ulttyq ekonomıka mınıstri Tımýr Súleımenovtiń tanystyrýymen «Qazaqstan Respýblıkasynyń Halyqaralyq Valıýta Qoryna, Halyqaralyq Qaıta Qurý jáne Damý Bankine, Halyqaralyq Qarjy Korporasııasyna, Halyqaralyq Damý Qaýymdastyǵyna, Investısııalar Kepildiginiń Kópjaqty Agenttigine, Investısııalyq Daýlardy Retteý jónindegi Halyqaralyq Ortalyqqa, Eýropa Qaıta Qurý jáne Damý Bankine, Azııa Damý Bankine, Islam Damý Bankine músheligi týraly» Qazaqstan Respýblıkasynyń Zańyna ózgerister engizý týraly» zań jobasyn talqylady.
«Atalǵan zań jobasy Qazaqstannyń Azııa Infraqurylymdyq Investısııalar Bankine músheligin zańnamalyq turǵydan retteýge baǵyttalǵan. Sondaı-aq bul qujat arqyly halyqaralyq uıymdarmen qatynas jasaýǵa ýákiletti memlekettik organdardy bekitýmen qatar, elimizdiń halyqaralyq uıymdarǵa músheligine baılanysty qarjylyq áreketterdi retteý kózdeledi», dedi baıandamashy T.Súleımenov.
Zań jobasyn ázirleýshilerdiń túsindirýinshe, mundaı qajettilik elimizdiń halyqaralyq uıymdarǵa músheligi salasyndaǵy qoǵamdyq qatynastardy reglamentteıtin quqyqtyq normalarǵa monıtorıng júrgizý barysyndaǵy anyqtalǵan olqylyqtar men keıbir qaıshylyqtardy joıý úshin týyndaǵan.
Otyrysta halyq qalaýlylarynyń biraýyzdan maquldaýyna ıe bolǵan ekinshi qujat – Qorǵanys mınıstriniń orynbasary Talǵat Muhtarovtyń tanystyrýymen – «Qarý saýdasy týraly shartty ratıfıkasııalaý týraly» zań jobasy boldy. 2003 jyly Nıý-Iorkte jasalǵan qarý saýdasy týraly Shart kádimgi qarý-jaraqtyń halyqaralyq saýdasyn retteý úshin ortaq halyqaralyq standarttardy belgileýge, sondaı-aq, kádimgi qarý-jaraqtyń zańsyz saýdasyn bolǵyzbaý men joıýǵa jáne zańsyz qaıta baǵyttalýyn aýyzdyqtaýǵa arnalǵan.
«Shart mynadaı sanattar sheńberindegi kádimgi qarý-jaraqtyń barlyq túrlerine qoldanylady: jaýyngerlik tankiler, jaýyngerlik brondalǵan mashınalar, úlken kalıbrli artıllerııalyq júıeler, jaýyngerlik ushaqtar, jaýyngerlik tikushaqtar, áskerı korablder, zymyrandar men zymyrandyq ushyrý qondyrǵylary, atys qarýy men jeńil qarý-jaraq syndy ónimder bar», dedi T.Muhtarov.
Sonymen qatar, Sharttyń 6-babynda kádimgi qarý-jaraq pen oq-dárilerdi jáne zaqymdaý quraldaryn, bólshekter men komponentterdi berýge tyıym salý jaǵdaılary da eskerilgen. Oǵan qosa, árbir qatysýshy memleket Shart erejelerin júzege asyrý úshin ulttyq baqylaý tizimimen qatar, ulttyq baqylaý júıesin quryp, paıdalanady jáne oǵan qatysty máseleler boıynsha aqparat almasý maqsatynda ulttyq baılanys ortalyǵyn taǵaıyndaıdy.
Sondaı-aq qatysýshy memleket qarý-jaraq eksporty boıynsha naqty operasııalardy oryndaýǵa ruqsattar berýdi ulttyq esepke alýdy júrgizedi jáne jyl saıyn aldyńǵy jyl úshin ruqsat etilgen qarý-jaraqtyń eksporty men ımporty týraly aqparatty qamtıtyn baıandama usynatyn bolady. Osyndaı mindettemelerdi oryndaý úshin arnaıy Hatshylyq qurylady da, ol óz kezeginde qatysýshy memleketterdiń Konferensııasyn shaqyrady.
Osy kúni depýtattar bekitilgen kún tártibine saı, «Qazaqstan Respýblıkasy Úkimeti men Grýzııa Úkimeti arasyndaǵy Qazaqstan Respýblıkasy Úkimetiniń Grýzııa Úkimetine bergen memlekettik kredıtteri boıynsha Grýzııa Úkimetiniń bereshegin qaıtadan qaıta qurylymdaý týraly kelisimderdi ratıfıkasııalaý týraly», «Qazaqstan Respýblıkasynyń Úkimeti men Ázerbaıjan Respýblıkasynyń Úkimeti arasyndaǵy Halyqaralyq avtomobıl qatynasy týraly kelisimdi ratıfıkasııalaý týraly» jáne «Qazaqstan Respýblıkasy men Azııa Damý Banki arasyndaǵy №2967-KAZ Qaryz týraly kelisimge túzetýlerge qatysty Qazaqstan Respýblıkasy men Azııa Damý Banki arasyndaǵy kelisim-hatty ratıfıkasııalaý týraly» zańynyń jobasy boıynsha qorytyndy ázirleý jóninde qaýly qabyldady.
Nurlybek DOSYBAI,
«Egemen Qazaqstan»
