Qazaqstan halqy Assambleıasy Tóraǵasynyń orynbasary A.Hamedov: «Latyn álipbıine qazaq tiliniń kóshýi kezegin kúttirmeıtin, óz ýaqytynda qolǵa alynǵan ıgilikti shara. Elbasy «Habar» telearnasyna bergen suhbatynda onyń máni-jaıyn egjeı-tegjeıli aıtyp, ult erteńi úshin jasaǵaly otyrǵan baǵaly qadam dep túsindirdi. Bul iske memleketimizde ómir súrip otyrǵan barlyq etnos ókilderi bir kisideı atsalysýy kerek», dedi.
Jıynnyń moderatory bolǵan Almaty qalasy halyq Assambleıasy fılıaly tóraǵasynyń orynbasary K.Mamsýrov jıyndy óte jınaqy júrgizip, jýyrda ǵana Parlamentte talqylanǵan latyn álipbıiniń usynylǵan nusqasyna qatysty ártúrli pikirlerdiń aıtylyp jatqanyn sóz etti. «Barbang» kúrd qaýymdastyǵy tóraǵasy K.Mırzoev: «Biz latynǵa kóshpeımiz. Oǵan oralamyz. О́ıtkeni qazaq eli ótken ǵasyrdyń basynda osy grafıkamen oqyǵan. Qazaq tiliniń tarıhynda neshe álipbı boldy, sol ótkelderdiń bárinen aman ótip kele jatyr. Endi bul álipbıge de kóship, rýhanı qundylyqtardy bolashaqqa aman jetkizedi», dep tildiń tarıhy týraly, latyn álipbıiniń qazaq tiline ıkemdiligi týraly aıtty. Almaty qalasy tilderdi damytý basqarmasynyń jetekshisi M.Ahetov: «Elbasy bastamasyndaǵy latyn álipbıine kóshý jumysy qoǵamda qyzý talqyǵa salynyp otyr. Nursultan Nazarbaev qazaq tili men orys tiliniń endigi jaǵdaıyn anyq aıtty. Orys tilindegi basylymdar kırıll árpimen shyǵa beredi. Qazaq tili derbes damıdy», dedi.
Til – kez kelgen memlekettiń, ulttyń biriktirýshisi. Memlekettik tildiń elimizdegi mártebesi latyn álipbıimen bekı túsip, jetekshi tildik kúshke aınalady dep qorytyndy jasady jıynǵa qatysýshylar.
Baǵashar TURSYNBAIULY,
«Egemen Qazaqstan»
ALMATY
