Oblystaǵy joǵary oqý oryndary «bizdiń túlekterimizdiń pálenshe paıyzy jumysqa turdy» dep súıinshi suraǵanymen indetip izdeseńiz, sol jumysqa turǵandardyń deni qaǵaz júzinde ǵana bolyp shyǵady. Osyndaı jaǵdaıda Aqmola oblysy Kókshetaý qalasyndaǵy «Novopek» seriktestigi ókilderi «bizge 600 maman jumysshy kerek» dep ońtústikke arnaıy kelip ketti.
Bul týraly óńirlik kommýnıkasııalar qyzmetinde ótken brıfıngte oblys ákiminiń orynbasary Erbol Sadyr aıtty.
Elbasy «Qazaqstannyń úshinshi jańǵyrýy: jahandyq básekege qabilettilik» atty Joldaýynda eńbek kúshi kóp aımaqtan jumys qoly tapshy óńirlerge mamandardy qonystandyryp, eńbek naryǵyn jańǵyrtý qajettiligin aıtqan bolatyn. Elbasynyń osy tapsyrmasyn oryndaý maqsatynda oblys ákimi Janseıit Túımebaev tarapynan júıeli jumystar júrgizilip jatyr. Jumys qoly kerek oblystarmen memorandýmǵa qol qoıylǵan. Sonyń jaqsy nátıjesin oblys jastary sezinýde.
«Novopek» seriktestigi Keden odaǵynyń normalaryna sáıkes polıpropılen qaptary men jumsaq konteınerler shyǵaratyn zaýyttardyń biri. 2003 jyly qurylǵan kásiporyn polımerli oraý sheshimderin ázirleýge, óndirýge jáne jetkizýge mamandanǵan. Qazirgi kezde aýdany shamamen 45 myń sharshy metrdi quraıtyn óndiristik keshende 600 adam jumys isteıdi. Kompanııa basshysy Kókshetaý qalasyndaǵy zaýytta jumys istegisi keletin azamattar bolsa, olarǵa barlyq jaǵdaıdy jasaımyz dep sendirip otyr. Onyń sózinshe, qazir zaýytta jumys kúshiniń jetpeýi saldarynan kóptegen qondyrǵylar toqtap tur. Qosymsha 600-den astam jumysshy kelse ónimdilikti eki esege deıin arttyryp, Eýropa naryǵyna da shyǵýǵa múmkindik bar. Iаǵnı qazir aıyna 6 mln danadaı qap tigilse, onyń kólemi 11 mln-ǵa deıin artady.
Kompanııa basshysy ońtústikke kelgen saparynda «Zaýytqa negizinen úsh mamandyq – mashınıst, operator men tiginshi qajet ekenin aıtty. Kelgen jumysshylardy aldymen arnaıy kýrstarda oqytyp, 40 myń teńgeden stıpendııa beremiz. Odan keıin jumysqa qabyldanyp, jataqhanamen qamtylady. Jalaqylary 80-150 myń teńgeniń aralyǵynda bolady. Qazirgi tańda zaýyttyń janynan turǵyn úı kesheni salynýda. Ol jerge 300-deı jumysshy qonystanatyn bolady. Sondyqtan, biz jumysshylardy otbasylarymen kelse de qabyldaımyz. Aldaǵy ýaqytta olarǵa qala aýmaǵynan úıirgelik jer bólý máselesi de qaralyp jatyr», dedi.
Tórt kúndik sapary barysynda zaýyt basshylyǵy Túrkistan qalasy men Saıram, Saryaǵash aýdanynyń turǵyndarymen kezdesti.
Ońtústiktiń jumysqa qat jastary úshin bul aspannan altyn jaýǵan kúnmen teń bolyp tur.
Baqtııar TAIJAN,
«Egemen Qazaqstan»
Ońtústik Qazaqstan oblysy
