Oblystyń zııaly qaýymy, jastar, oqýshylar jáne BAQ ókilderi qatysqan jıynda Alash úshin ardaqty Báýkeńniń, Baýyrjan Momyshulynyń kelini taǵylymdy oılarymen bólisti. Syrlasý keshin Ádet-ǵuryp jáne salt-dástúr ortalyǵynyń dırektory Jánibek Taǵaev júrgizip otyrdy.
– Baqytjan dúnıeden ótkennen keıin kúırep qalǵandaı kúı keshtim, – dedi batyrdyń kelini. – Qazaqta kóńil sháı degen bolady. Osyndaı kúızelip júrgenimde Ońtústik Qazaqstan oblysynyń halqy kóńil sháıǵa shaqyryp, qaıǵymdy jeńildetti, óz-ózime kelýime járdemdesti. Sondyqtan, halqymyzdyń salt-dástúrlerin barynsha ustaıtyn, ulttyń uıytqysyna aınalǵan Ońtústiktiń orny men úshin qashanda erek.
Ádemi ázil, jarasymdy syrlasýmen ótken keshte talaı áńgimeniń tyǵyny aǵytyldy.
«Jaqsy úıge túsken kelin – kelin, jaman úıge túsken kelin – kelsap». Qazaqtyń taǵylymdy qanatty sózderinen tuzdyq jasaǵan Zeınep Ahmetova ulttyq qasıetti ardaqtaý jaıyn aıtty. Salt-dástúr degende kópshiliktiń besikke salý, tusaý kesý, betashar sııaqty ǵuryptardy ber jaǵynan ǵana biletindigin mysalǵa keltirdi.
Ulttyń tárbıesi – anadan. Sondyqtan da, «ana bir qolymen – besikti, bir qolymen álemdi terbetedi» degen támsil bar. Jazýshy Zeınep Ahmetova qazaq qyzdarynyń keıbir beıádep qylyqtaryn synap, jaqsy kelin bolýǵa talpynýdyń jaıyn aıtty. «Ár qazaq kelini – ene mektebinen ótý kerek» degen jazýshy enelerdiń osy qasıetti ataýǵa laıyqty bolýyn jaqsy mysaldarmen uǵynyqty jetkizdi. Áserli kesh júrekke jaqyn syrlasýǵa ulasty.
Baqtııar TAIJAN,
«Egemen Qazaqstan»
Ońtústik Qazaqstan oblysy
