Sýret teatrdyń ádebıet bóliminen alyndy
Qoıylymdaǵy oqıǵa negizinen úsh jigit pen bir qyzdyń arasynda órbıdi. Sahna artynda telefonmen ǵana tildesetin tórtinshi jigit ben «kári qyz» - Saıranyń qurbysy Aıjan ara-tura ǵana boı kórsetedi. Biri maqtanshaq aqyn, biri jasqanshaq ǵalym, endi biri mansapqor úsh jigittiń betperdesi qoıylym sońynda basty róldegi qyzdyń úlken qyzmettegi ákesi jumystan bosaǵan kezde ashylady. Jeńgetaı qurbysynyń da «qoı terisin jamylǵan» qasqyr ekeni málim bolady.
Qoıylym rejısseri Sahan Ákeleev komedııa ótken ǵasyrdyń 80-inshi jyldary jazylsa da, qaýzaǵan taqyryby búgingi kúni de óz ózektiligin joǵaltpaǵanyn aıtady. «Kóptegen boıjetkenderimizdiń «kári qyz» atanyp, jigitterdiń «súrboıdaq» degen aıdar taǵynýy qazirgi zamanda kóbeımese, azaıǵan joq. Mansapqor, jaǵympaz, ataqqumar adamdardyń qatary da arta túspese, kemimegeni anyq. Sahna - adamnyń ishki aınasy. Kórermen ózderi bálkim kúnde aralasyp júrgen, bálkim kúnde esigin qaǵyp júrgen adamdaryn sahnadan kórip, oılansyn degen nıetpen qoıyp otyrmyz. Komedııany osyndaı rejısserlik kózqaraspen búgingi kúnniń suranysyna, búginginiń talabyna saı etip yqshamdap, ózimizshe traktovka jasadyq», - deıdi rejısser. Komedııa sońynda serilerdi sergeldeńge salǵan «kári qyz» - Saıranyń rólindegi Nazerke Aıdynovamen tildeskenimizde óziniń jasy kishi bolǵandyqtan 30-daǵy áıeldiń beınesin somdaý ońaıǵa túspegenin, degenmen de sahnadaǵy seriktesteri men kórermenniń ystyq yqylasy jigerlendirgenin jetkizdi.
Reti kelgende aıta keteıik, О́skemendegi oblystyq qazaq drama teatry bıyl 30-ǵa tarta jas akterlermen tolyqqan bolatyn. Teatrdyń kórkemdik jetekshisi Sahan Ákeleev oblys basshylyǵynyń qoldaýymen olardyń 20-dan astamyna qyzmettik páter berilgenin aıtty.
Azamat QASYM,
«Egemen Qazaqstan»
