Is-sharaǵa Qazaqstan Respýblıkasy Tuńǵysh Prezıdenti – Elbasy qory atqarýshy dırektorynyń orynbasary Sultan Aıtjanov pen Memlekettik tildi damytý qorynyń dırektory Azat Sháýeev qatysty.
Memleket basshysy Nursultan Nazarbaev «Qazaqstannyń Úshinshi jańǵyrýy: jahandyq básekege qabilettilik» atty Joldaýynda elimizde sıfrlyq servısterdi damytý qajettiligine erekshe toqtalǵan bolatyn. Prezıdent tapsyrmasyn júzege asyrý maqsatynda qolǵa alynǵan «Qazaqstan 3D» jobasy Qazaqstandy tanystyrýdaǵy erekshe mýltımedııalyq jolserik deýge bolady.
Jańa tehnologııaǵa negizdelgen «Qazaqstan 3D» jobasynyń basty maqsaty ǵalamtor jelisiniń múmkindigi arqyly óz otandastarymyzdy, sheteldik qonaqtardy respýblıkamyzdyń kórnekti jerlerimen tanystyrý bolyp tabylady. Qazirgi zamanǵa saı daıyndalǵan veb-saıt pen Android jáne iOS platformalaryndaǵy qosymsha júıeli qurylymymen, qolaıly ınterfeısimen erekshelenedi, munda Qazaqstannyń tanymal týrıstik oryndary 3D modelinde tanystyrylady. Saıt álem jurtshylyǵynyń Qazaqstan týraly tolyǵyraq maǵlumat alýyna múmkindik beredi, al elimizge saıahat jasaýǵa qyzyǵýshylyq tanytqan sheteldik azamattardyń ǵalamtor arqyly ózine senimdi seriktes taýyp, qaýipsiz saıahat jasaý baǵytyn anyqtaýǵa jáne qolaıly turǵynjaı tańdaýyna kómektesedi. Joba úsh tilde: qazaq, orys jáne aǵylshyn tilderinde usynylyp otyr.
«Osyndaı paıdaly resýrstardy ashý arqyly biz rýhanı baılyǵymyz ben ulttyq mádenıetimizdi, salt-dástúrimiz ben tarıhymyzdy nasıhattaýǵa, jastardyń óz eline, týǵan jerine degen súıispenshiligin qalyptastyrýǵa jáne olardyń IT salasyndaǵy bilim-bilikterin jetildirýge yqpal etemiz», - dep atap ótti Sultan Aıtjanov brıfıngte.
Ulttyq salt-dástúrimiz ben ádet-ǵurpymyzdy, qazaq halqynyń mádenı, ádebı jáne rýhanı qundylyqtaryn saqtaý – Memleket basshysy N.Á.Nazarbaevtyń «Bolashaqqa baǵdar: rýhanı jańǵyrý» baǵdarlamasynyń negizgi baǵyttary bolyp otyr. Osy maqsatta qazaqtyń dástúrli dúnıetanymyndaǵy osy fılosofııalyq túsinikter «Jeti qazyna» mobıldi qosymshasynyń qurylymy men mazmunyna arqaý boldy. Qosymshanyń «Kıeli sandar syry», «Salt-dástúr», «Asyl mura», «Sóz sandyq», «Altyn zer», «Taıqazan», «Uly dala ǵajaıyptary» dep atalatyn 7 bólimi qazaq jáne orys tilderinde mol maǵlumat beredi. Resýrs ata-babamyzdan qalǵan mura retinde urpaqtan urpaqqa jetkizilip kele jatqan tarıhı ańyzdar men shejireden syr shertedi, mádenı qundylyqtarymyzdy tanystyrady. Qazirgi ýaqytta «Qazaqstan 3D» jáne «Jeti qazyna» qosymshalaryn Android jáne iOs platformalarynda júktep alýǵa bolady.
