G.Ábdiqalyqova halyqty áleýmettik qorǵaý salasyndaǵy biryńǵaı álemdik saıasatty júzege asyrý isinde qaýymdastyqtyń mańyzdy ról atqaratyndyǵyn atap ótti. Memlekettik hatshynyń aıtýynsha, Qazaqstan uıymnyń maqsattaryna qoldaý kórsetip keledi jáne áleýmettik qamsyzdandyrý júıesin jetildirý baǵytynda birlese jumys júrgizýge múddeli.
«HÁQQ-men yntymaqtasa jumys istegenimizge 5 jyl boldy. Osy ýaqyt aralyǵynda uıym qoldaýymen eldegi áleýmettik qamsyzdandyrý júıesin jetildirý jaqsardy. Halyqty áleýmettik qamsyzdandyrýdyń 3 kezeńdik júıesi iske asyp, tıimdiligin kóz kórdi», – degen G.Ábdiqalyqova qaýymdastyq tóraǵasynyń jumysyna iltıpatyn bildirdi.
Memlekettik hatshy Qazaqstannyń áleýmettik damytýdyń 2030 jylǵa deıingi tujyrymdamasynda belgilengen halyqty áleýmettik qorǵaý salasyndaǵy saıasatty bizdiń elimiz kezeń-kezeńimen júrgizip kele jatqanyn aıtty. Búginde Qazaqstan áleýmettik jáne ekonomıkalyq jetistikteriniń arqasynda jumyspen qamtý men jappaı kásipkerlikti damytýǵa, halyqty áleýmettik qorǵaýdyń ornyqty qyzmet atqaratyn júıesin qurýǵa járdemdesip keledi.
Kezdesýde G.Ábdiqalyqova qaýymdastyqtyń Tehnıkalyq komıssııasynyń quramyna Qazaqstan alǵash ret 2016 jyly kirgenin atap ótti. Onyń pikirine súıensek, bul qadam halyqaralyq uıym qyzmetine elimizdiń qatysý belsendiligin arttyra túsetin tyń serpin.
Memlekettik hatshy kezdesý sońynda qaýymdastyqtyń Bas hatshysy Hans-Horst Konkolevskıdiń Qazaqstanǵa saparyna tabys tiledi.
Abaı Asankeldiuly,
«Egemen Qazaqstan»
