Alqaly jıynǵa Din isteri jáne azamattyq qoǵam vıse-mınıstri Berik Aryn, Parlament Májilisiniń depýtaty Baqytbek Smaǵul, Qazaqstan musylmandary dinı basqarmasy tóraǵasynyń orynbasary, «Nur Astana» meshitiniń bas ımamy Naýryzbaı О́tpenov, Astana qalasyndaǵy Qasıetti-Ýspen kafedraldy soborynyń aǵa dinı qyzmetkeri, proteıereı Dmıtrıı Baıdek, sondaı-aq, elimizge belgili ózge de dintanýshylar men sarapshylar qatysty.
Konferensııada alǵysózdi alǵan Berik Aryn sońǵy jyldary halyq arasynda dinge betburýshylyqtyń jyldam artqany, alaıda, belgili bir bóligi radıkaldy toptarǵa erip ketkenin aıtty. Osy rette ol Elbasy maqalasynda aıtylǵandaı dinı ekstremızmge múldem tózbeýshilikti qalyptastyrýymyz mańyzdy ekenin taǵy bir márte eske salyp ótti.
Bolashaq jastardyń qolynda. Sondyqtan óskeleń urpaqqa durys tárbıe berý úshin eń aldymen bilim oshaǵyna nazar aýdarylýy kerek. Bul rette vıse-mınıstr mektep baǵdarlamasynan dintaný sabaǵy alynyp, onyń ornyna qoǵam jáne dintaný páni engiziletinin jetkizdi.
– Qazir osyǵan baılanysty arnaıy jumystar júrgizilip, oqýlyqtar ázirlenip jatyr. Endi Bilim jáne ǵylym mınıstrligine qarasty ǵylymı keńestiń talqysynan ótýi kerek. Naqty qaı ýaqyttan bastap mektep baǵdarlamasyna engiziletinin aıta almaımyn. Biraq kelesi oqý jylynan bastaý alýy múmkin, – dedi Berik Aryn
Al Májilis depýtaty Baqytbek Smaǵul terrorızmniń aldyn alý úshin ulttyq qundylyqtarymyz keńinen nasıhattalýy qajet ekenin, osy úshin barynsha jaǵdaı jasalýy kerektigin aıtty.
– Qazir túrli aǵym ókilderi dinı saýaty az jastardy ózderine tartyp, týra joldan adastyryp júr. Al ulttyq qundylyqtarymydy nasıhattaý arqyly jastarymyzdy tárbıelep, rýhanı sýsyndaýyna járdem etemiz. Búginde bedeldi qoǵamdyq uıymdardyń basy-qasynda halyqty sońyna jınaı alatyn, birlikti nasıhattaı biletin azamattar bar. Osyndaı azamattarymyzdyń arqasynda el ishindegi tynyshtyqty, tatýlyqty saqtaýymyzǵa bolady. Sondyqtan mundaı uıymdar ekstremızmge qarsy is-qımyl jumystaryna neǵurlym kóbirek tartylýy kerek, – dedi Baqytbek Smaǵul.
Jıynda sóz alǵan Qazaqstan musylmandary dinı basqarmasy tóraǵasynyń orynbasary Naýryzbaı О́tpenov ıslam dininiń artyqshylyqtary týraly qysqasha túsindirip ótti. Ol ıslam sózi beıbitshilik, amandyq degen uǵymdardy bildiretinin, sondyqtan din kez kelgen qantógiske qarsy ekenin aıtty.
– Búginde din atyn jamylǵan túrli ekstremıstik toptar kóbeıip ketti. О́kinishke qaraı, olardyń uıymdastyrǵan árbir áreketteri ıslamǵa kúıe jaǵyp otyr. Olardyń bilimsizdigine, jat aǵymdardyń jetegine ketkeni úshin ıslam dinine kiná artýǵa bolmaıdy. Sebebi, dinde eshqandaı zorlyq joq. Musylmandar tek beıbit ómirdi qoldaıdy, – dedi Naýryzbaı О́tpenov.
Iá, aıtylǵannyń bári ras. Búginde teris aǵymnyń jeteginde ketip, jurt arasyna iritki salyp otyrǵandardyń sany qanshama. Olardyń bilimsizdigi men nadandyǵynan qarapaıym halyq zardap shegip otyrǵanyn jasyryp qalýǵa bolmas. Al osyndaı alqaly jıyndar jastardyń boıynda dinmen birge týra joldy nasıhattaıtynyn aıta ketken jón.
Aıan ÁBDÝÁLI,
«Egemen Qazaqstan»
