«Sırııalyq retteýdegi qaýipti jaǵdaıdy Astana prosesi kádimgideı qutqaryp shyqty», dedi M.Laıchak Nıý-Iorktegi BUU shtab-páterinde jaqynda Qazaqstan Syrtqy ister mınıstri Qaırat Ábdirahmanovpen kezdesýi barysynda.
Slovak saıasatkeri óziniń Bas Assambleıada tóraǵalyq etý kezindegi janjaldardyń aldyn alý, kóshi-qon máseleleri jáne BUU reformasynda Bas hatshyny qoldaý sekildi úsh basymdyǵy týraly aıtty. Ol BUU kún tártibindegi barlyq ózekti máseleler boıynsha Qazaqstanmen tyǵyz qarym-qatynasta jumys isteýge ázirligin bildirdi.
Q.Ábdirahmanov Qazaqstan Prezıdenti Nursultan Nazarbaevtyń 29 tamyzda MAGATE-niń Tómen baıytylǵan ýran bankiniń ashylý rásimi barysynda jarııalaǵan bastamalary týraly habardar etti. Atap aıtqanda, ıadrolyq qarý ıelenýshi elderdiń sammıtin shaqyrý, ıadrolyq qarýsyz óńirlerge kiretin barlyq memleketterdiń kúsh-jigerin biriktirý máseleleri sóz boldy. Mınıstrdiń aıtýynsha, Qazaqstan ıadrolyq qaýipsizdik jónindegi jahandyq sammıtti Astanada ótkizýge daıyn.
Kezdesý barysynda BUU-nyń Almatyda halyqaralyq óńirlik habyn qurýdyń praktıkalyq aspektileri talqylandy.
BUU Bas Assambleıasy 72-shi sessııasynyń aıasynda Qazaqstan Syrtqy ister mınıstri BUU Bas hatshysynyń terrorızmge qarsy kúres jónindegi orynbasary Vladımır Voronkovpen jáne qarýsyzdaný máseleleri jónindegi orynbasary Isýmı Nakomıtsýmen kezdesti.
Qazaqstannyń BUU Qaýipsizdik Keńesinde tóraǵalyq etýge daıyndyǵyna baılanysty Q.Ábdirahmanov Mońǵolııa, Birikken Arab Ámirlikteri, Majarstan, Býrýndı, Gambııa, Gabon jáne Býrkına-Faso syrtqy ister mınıstrlerimen de ekijaqty kezdesýler men konsýltasııalar ótkizdi.
Afrıka memleketteri BUU Qaýipsizdik Keńesiniń kún tártibindegi damýshy álemniń múddelerin qozǵaýǵa qatysty Qazaqstannyń dáıekti jáne ádil ustanymyna rızashylyqtaryn bildirdi. Qazaqstan tarapy Afrıka qurlyǵynyń ókilderine Astanadaǵy EKSPO-2017 kórmesine belsendi qatysqandary úshin alǵys aıtty.
