Teatrdyń kórkemdik jetekshisi, halyq ártisi, Qazaqstannyń Eńbek Eri Asanáli Áshimovtiń shyǵarmashylyq keshi de atyraýlyq kórermen aıta júrer aıtýly oqıǵanyń biri boldy.
Teatr ártisteri sahnalaǵan «Tańsulý», «Aqtastaǵy Ahıko», «Júz jyldyq mahabbat», «Baqyt kilti», «Qoshtasqym kelmeıdi», «Qyz Jibek», «Móldir mahabbat», «Tenderge túsken kelinshek» qoıylymdarynyń qaı-qaısysynyń da shoqtyǵy bıik. Atap óterligi, bul spektaklderdi tek oblys ortalyǵyndaǵy ǵana emes, alys aýdandardaǵy turǵyndar da tamashalady. Almatydan kelgen ártister aýyldarǵa arnaıy baryp, elmen júzdesti, spektakl qoıdy. Atyraýdaǵy bilim ordalarynda, mádenıet mekemelerinde kezdesý, sheberlik sabaqtaryn ótkizdi.
О́ner sapary belgili jazýshy-dramatýrg Rahymjan Otarbaevtyń «Beıbarys sultan» tarıhı dramasymen qorytyndylandy. Jaıyǵyn saǵynyp, bir túp jýsandy ańsap ótken Beıbarystyń taǵdyry sýrettelgen qoıylym kórermenge erekshe áser syılady.
«Rýhanı jańǵyrý» baǵdarlamasynyń aıasynda Alataýdan Atyraýǵa sapar shegip, qazaq óneriniń qara shańyraǵy M.Áýezov atyndaǵy qazaq memlekettik akademııalyq drama teatry eki apta boıy Jaıyq jurtyna ónerin kórsetti. Eldiń rýhyna rýh qosatyn, aıtýly shyǵarmalarymyzdy alyp keldik. Atyraý elimen kıeli sahna arqyly tildestik. Osyndaı múmkindik syılaǵan oblys basshylyǵyna alǵysymyz sheksiz, - deıdi teatr basshysy Erlan Bilál.
Baqytgúl BABASh,
«Egemen Qazaqstan»
ATYRAÝ
