«Atanǵanym Myrzataı – el arqasy»
Atyraýda ótken memleket jáne qoǵam qaıratkeri Myrzataı Joldasbekovtiń shyǵarmashylyq keshi osylaı ataldy. Bar ǵumyryn el ıgiligin eseleýge arnap kele jatqan aıtýly tulǵany Qurmanǵazy atyndaǵy mádenıet saraıyna jınalǵan Atyraý jurty qoshemet kórsetip qarsy aldy.
Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda munaıly aımaqta mádenı sharalarǵa aıryqsha kóńil bólinip keledi. Tek Atyraýdyń ǵana emes, kúlli qazaq eliniń maqtanyshyna aınalǵan, ómirleri ónegege toly qoǵam qaıratkerleri, aqyn-jazýshylar men óner ıeleriniń shyǵarmashylyq keshteri jıi uıymdastyrylyp júr. Osy baǵdarlama aıasynda fılologııa ǵylymdarynyń doktory, akademık Myrzataı Joldasbekov te Atyraýǵa kelip, elmen júzdesti.
«Qazaq rýhanııatynyń abyzy, memleket qaıratkeri Myrzataı Joldasbektovtiń ómirin, taǵdyr taýqymetin bir adamdaı kótergenin, qajymaı-talmaı, jasymaı búginge jetkenin beınefılm arqyly baǵamdadyq. «Soǵys balalary» dep atalǵan býyn ádebıet pen mádenıetke óz qoltańbalaryn qaldyrdy. Sol bir qıyndyqtyń neshe súleıin kórip ósken balalar búginde ǵulamalar men abyzdarǵa aınaldy. Eldiń damýyna óz úlesterin qosty. Myrzataı aǵamyz – ustaz retinde de, qoǵam qaıratkeri retinde de óskeleń urpaq tárbıesine óz úlesin qosqan adam. Orhon-Enıseı kóne jazýlaryn zerttep, ulttyq qundylyqtardy saqtaý jolynda eńbek etti. Myrzataı aǵaǵa qarap boı túzegen azamattar kóp. Aǵamyz Elbasy Nursultan Nazarbaevpen birge táýelsizdikti baıandy etý jolynda aıanbaı qyzmet jasady,» dedi shyǵarmashylyq keshke qatysqan oblys ákimi Nurlan Noǵaev.
Ádebı-mýzykalyq sharany jyrshy Amandyq Kómekov arnaý aıtyp bastady. Myrzataı Joldasbekovtiń ǵalym, qaıratker ekenin el biledi, kúıshiligi bólek bir óner. «Qosbasar» men «Dúnıe shirkin» kúılerin Qazaqstannyń eńbek sińirgen ártisi Turar Álipbaev oryndady. Ánshi Ardaq Balajanova Kenen Ázirbaevtyń «Myrzataıǵa» degen ánin shyrqap, keshtiń kórkin keltirdi.
Qazaqstannyń Iran men Pákistandaǵy tótenshe jáne ókiletti elshisi qyzmetinde júrgen kezinde jazǵan «Totyqus» áni de «jigitke jeti óner de az» degen babalar danalyǵyn eske túsiredi. «Dúnıe-aı», «Báıterek» syndy ánder de osy keshte áýeledi.
«Azamat bolyp qalyptasýym, ataǵym men dańqymnyń shyǵýy — eldiń aqedil kóńiliniń arqasy,- dedi Myrzataı Joldasbekov. -Meniń ánderim men kúılerim — ómirimniń aınasyndaı. Jan tolǵanysynan dúnıege kelgen shyǵarmalarym eldiń kóńilinen shyqsa, baqyt degen sol.»
Baqytgúl BABASh,
«Egemen Qazaqstan»
ATYRAÝ
