Qostanaı oblysynda on tórt otbasy baspanaly boldy. Onyń ishinde on otbasy Turǵyn úı qurylys jınaq bankiniń salymshylary bolyp tabylady. On tórt adamnyń barlyǵy da jer telimine kezekte turǵan bolatyn. «Nurly jer» baǵdarlamasynyń jeke turǵyn úı qurylysyn damytýǵa arnalǵan qanatqaqty jobasynyń aıasynda memleket salymshylarǵa tıesili 10 sotyq jerdi ǵana berip qoımaı, sol jer teliminde turǵyn úı salýǵa da kómektesti.
Qostanaı qalasynyń irgesinde oryn tepken Qostanaı aýdanyndaǵy Zarechnyı aýylynyń «Severnyı» shaǵyn aýdanynda alǵashqy bolyp úı alǵan qýanysh ıelerin Qostanaı oblysynyń ákimi Arhımed Muhambetov pen Turǵyn úı qurylys jınaq bankiniń basqarma tóraıymy Lázzat Ibragımova quttyqtap, baspana kiltin tabys etti.
«Elbasynyń tapsyrmasymen elimizde «Nurly jer» baǵdarlamasy júzege asyp jatyr. Qazaqstanda birinshi bolyp, bizdiń qostanaılyqtar osy baǵdarlama aıasynda baspanaly boldy. Infraqurylymyna 600 mıllıon teńge ketti. Oǵan sý men gaz qubyrlary júrgizildi. Endi 1 mıllıard 900 mıllıon teńge kelesi jyly jol salýǵa jáne 250 mıllıon teńge kanalızasııa qubyrlaryn salýǵa jumsalatyn bolady. Baspana salýǵa bólinetin qarjy kólemi jyl saıyn ulǵaıyp keledi. Ol 2015 jylmen salystyrǵanda 5 ese kóbeıdi. Taǵy da 400 mıllıard teńge qarastyryp otyrmyz, munymen árıne toqtamaıdy, aldaǵy jyldary qosymsha taǵy da qarjy qarastyratyn bolamyz» dedi Arhımed Begejanuly.
Tuńǵysh ret respýblıkada adamdar memlekettik baǵdarlama aıasynda páter emes, jer ýchaskesi bar, kottedj alyp otyr.
«Biz ákimdik, qurylys júrgizýshi kompanııalar, Turǵyn úı qurylys jınaq banki jáne Qazaqstan ıpotekalyq kompanııasy birlesip, qazaqstandyqtarǵa qoljetimdi jolmen, artyq salmaq túsirmeı baspanaly bolýǵa kómektesip jatyrmyz» dedi Turǵyn úı qurylys jınaq bankiniń basqarma tóraıymy Lázzat Ibragımova.
Qostanaı qalasynyń turǵyny Serik Qabıev on jyl buryn jer telimine jazylǵan edi, bankke aqsha jınaǵan bolatyn. Ol 115 sharshy metr úıdiń ár sharshy metrin 115000 teńgeden aldy. Úı baǵasynyń 30 paıyzyn tólep, qalǵanyn tóleýge bank 5 paıyzdyq ústememen nesıe berdi.
«Qýanyshymyzda shek joq. Merdiger kompanııa úıdi 3,5 aıda salyp bitti. Ishi keń, úsh bólme, esiktiń aldynda jeri bar, osyndaı úı ózimizdiń armanymyz bolatyn» deıdi Serik Qaıyrbekuly.
Jyl sońyna deıin taǵy da 60 otbasy osy jerden baspanaly bolady. Shaǵyn turǵyn aýdannan 270 úı salynbaq.
Názıra JÁRIMBET
«Egemen Qazaqstan»
QOSTANAI
