– Rýmynııaǵa qarsy oıynǵa degen daıyndyqtaryńyz qandaı dárejede?
– Rýmynııa – óte myqty qurama. Byltyr Fransııada ótken Eýropa chempıonatynda sátti óner kórsetti. Menińshe, bizdiń fýtbolshylar rýmyndardan jeńilmeýge tıis. Jankúıerler tartysty oıynǵa kýá bolady dep oılaımyn. Biz sońǵy eki matchty sátti ótkizip, kez kelgen komandaǵa laıyqty qarsylyq kórsete alatynymyzdy dáleldeýimiz kerek. Men óz komandama, fýtbolshylaryma senemin.
– Byltyr Astanada ótken oıynda Rýmynııamen teń oınap, bir upaı alǵan edik. Syrt alańda da upaı alý úshin ne isteý kerek dep oılaısyz?
– Bir oıyn bir oıynǵa eshqashan sáıkes kelmeıdi. Belgili bir oıyndaǵy árbir jaǵdaı kelesi matchta ózgerip otyrady. Mysaly, Polshaǵa qarsy ótken oıynda Roman Murtazaev gol salyp, 1:0 esebimen alǵa shyǵyp edik. Biraq, ol goldy tóreshi eseptemeı tastady. Dál osy gol búkil oıyn nátıjesin ózgertip jiberýi múmkin edi. Sondyqtan, oıyn órnegine birneshe faktorlar áser etedi. Qazirgi ýaqytta biz qateliktermen jumys istep, jattyǵýlarymyzdy pysyqtap jatyrmyz. Bizdiń dál qazirgi basty kemshin tusymyz – standartty jaǵdaı.
– Bizdiń qurama Armenııaǵa qarsy oıynǵa qandaı kóńil-kúımen shyǵady dep aıta alasyz?
– Men árdaıym óz fýtbolshylaryma senemin. Buıyrtsa, aldaǵy Rýmynııadaǵy oıynda jeńiske jetip, Armenııaǵa qarsy jaqsy kóńil-kúımen oınaımyz degen nıettemin.
– Rýmynııaǵa qarsy oıynǵa beldi oıynshylar Baýyrjan Islamhan, Iýrıı Logvınenko jáne Georgıı Jýkovtyń qatysa almaıtyny belgili. Bul aldaǵy oıynǵa qanshalyqty áser etýi múmkin?
– Fýtbolshylardyń jaraqat alýy belgili bir deńgeıde oıynǵa áser etedi. Aldaǵy matchta ulttyq quramanyń ózge oıynshylaryna senim artyp jáne olardyń ózderin kórsetýlerine múmkindik beremiz.
Eger 2018 jylǵy álem chempıonatynyń irikteý kezeńindegi oıyndarǵa taldaý jasaıtyn bolsaq, eki kezdesýde fýtbolshylarymyzdyń biri alańnan qýylyp, on adammen qalǵan kezimiz boldy. Árıne, bul oıynnyń nátıjesine tikeleı áser etti. Sol bir sát oıynshynyń qyzyl qaǵaz alýyna turarlyq pa edi? Mine, osy jóninde kóbirek aıtýǵa bolar... Biraq, muny da basty nazarda ustap, aldaǵy ýaqytta qatelikti qaıtalamaýǵa tyrysýymyz kerek. Mundaı joǵary deńgeıli matchtarda on oıynshymen oınaý ońaıǵa soqpaıdy.
– Erevanda ótken matchta ulttyq quramamyz laıyqty óner kórsetti. Eger oıynshymyz alańnan qýylmaǵanda Armenııa astanasynan keminde bir upaı alýymyz ábden múmkin edi ǵoı...
– Negizi biz nashar oınadyq dep aıta almaımyn. Belgili bir ýaqytta match tizginin óz qolymyzǵa aldyq, basymdyǵymyz da bilinip jatty. Biraq fýtbolshylardyń jekelegen sheberligi aıtarlyqtaı ról atqarady. Quramamyzda joǵary deńgeıli jigitter jınalǵan. Olar kez kelgen ujymǵa qarsy laıyqty deńgeıde oınaı alady. Sondyqtan komandama sońyna deıin senim artatyn bolamyn.
– Mhıtarııandy tusaý úshin qandaı amaldar qoldanýdy josparlap otyrsyz?
– Fýtbol – komandalyq oıyn. Sondyqtan bul jerde komandanyń qalaı áreket etetini mańyzdy. Oıynshylardyń durys nusqaýlar alýy jáne jyldam oılaı bilýi qajet. Qarsylasyńdy jeńgiń kelse, fızıkalyq deńgeıiń, sheberligiń jaqsy bolýy kerek. Sondaı-aq, basymdyǵyńdy kórsetý úshin psıhologııalyq turǵyda da daıyn bolǵan jón.
– Jankúıerdiń qoldaýy da kúsh beredi emes pe?!
– Árıne, jankúıerlerimizge tek senim artyńyzdar, qoldaý bildirińizder degim keledi. О́ıtkeni, jasyl alańǵa eldiń eń basty komandasy shyǵady. О́kinishke qaraı, sońǵy kezderi jankúıerlerimizdi qýanta almaı júrmiz. Biraq qandaı qıyn jaǵdaı bolmasyn, el namysyn qorǵaıtyn ujymǵa qoldaý bildirý kerek. Komandamyzdyń qıyn kezeńine qaramaı senim artyp, qoldaý kórsetken ár adamǵa alǵysym sheksiz. Ujymdaǵy jigitterdiń bári el namysyn qorǵaıtynyn, sonymen qatar artynda jaǵdaıyn oılap, alańdap otyrǵan qalyń halqynyń baryn jaqsy biledi. Biz alańǵa tek jeńilý úshin ǵana shyqpaǵanymyzdy dáleldeıtin bolamyz. Sońyna deıin kúresip, Rýmynııada jankúıerlerimizdi rıza etkimiz keledi. Jeńiske jetý úshin qolymyzdan kelgenniń bárin jasaımyz.
Áńgimelesken Álı BITО́RE,
«Egemen Qazaqstan»
