Jyl saıyn dástúrli túrde ótkiziletin psıho-fızıologııalyq synaq sharasy bul joly alǵash ret Astana qalasynda uıymdastyryldy. Oǵan Qazaqstan Respýblıkasy Qaýipsizdik Keńesiniń áskerı qaýipsizdik jáne qorǵanys bóliminiń jetekshisi general-maıor Mýslım Altynbaev pen Ulttyq ulan Bas qolbasshysy general-leıtenant Rýslan Jaqsylyqov jáne elimizdiń kúsh qurylymy arnaıy bólimsheleriniń, memlekettik organdardyń ókilderi qatysty.
Bıylǵy synaqta kúreń beretke úmitker jaýyngerler bas-aıaǵy 19 normatıvti oryndady.
Onyń ishinde jıyntyq qarý-jaraǵyn arqalap 75 shaqyrymdyq qashyqtyqty júgirip shyǵý, sýly ótkeldi maltyp ótý, tájirıbelik atys jáne belgilengen ýaqyt ishinde úsh qarsylaspen urysqa túsý normatıvteri bar.
Bıyl elimizdiń barlyq óńirinen kelgen kúreń beret kııýge úmitker eki júzge jýyq áskerı qyzmetshi kvalıfıkasııalyq synaq tapsyrýǵa ynta tanytty. Onyń tek 91-i ǵana jarys jolyna jiberilgen.
Eki kúnge josparlanǵan synaqta 18 jaýynger ǵana aqtyq synǵa deıin jetti.
Sondaı-aq, bıyl atalmysh synaqty sapaly ótkizý maqsatynda jáne kúreń beretke úmitkerlerdiń normatıvterdi oryndaýyn baqylaý úshin onyń barlyq kezeńinde «Kúreń beret» Ortalyq keńesiniń músheliginde turǵan 37 nusqaýshy jáne aǵa nusqaýshylar tartyldy.
Olarǵa basshylyq tarapynan saltanatty jaǵdaıda kúreń beret pen «Búrkit» keýde belgisi tabys etildi.
Osy joly synaqtan súrinbeı ótken 18 jaýyngerden bólek, arnaıy maqsattyń eki jaýyngeri kúreń beret kııý mártebesine ıe boldy. Olar Almaty men Aqtóbe qalasynda ótken arnaıy operasııalarda erlik kórsetken erjúrek jaýyngerler. Osylaısha, bıylǵy jyly 20 jaýynger kúreń beret ıesi atandy.
«Kúreń beret kııý mártebesi ıesine eshqandaı materıaldyq kómek alyp kelmeıdi. Olardyń jalaqysy burynǵysha qala bermek. Olar tek Otandy qorǵaý kezinde alǵy shepke shyǵyp, alǵashqylardyń biri retinde attanýǵa quqyǵy bar. Bul Otanǵa rııasyz berilgen azamattar retinde bolyp qala beredi. Bizdiń maqsatymyz osyndaı azamattardy iriktep, elimizdiń tynyshtyǵyn qamtamasyz etý», deıdi Ulttyq ulan Bas qolbasshysy general-leıtenant Rýslan Jaqsylyqov.
Nurlybek DOSYBAI,
«Egemen Qazaqstan»
