Jedelhatta Qazaqstan Prezıdentiniń kórnekti memleket jáne qoǵam qaıratkeri Uzaqbaı Qaramanovtyń dúnıeden ótkeni týraly habardy zor kúızelispen qabyldaǵany aıtylǵan.
«Uzaqbaı Qaramanuly búkil ǵumyryn halqy men týǵan eliniń ósip-órkendeýine arnady. Ol óziniń zor uıymdastyrýshylyq qabileti men qoǵamdaǵy bedeliniń arqasynda kóptegen joǵary laýazymdy memlekettik qyzmette bolyp, ózine júktelgen mindetterdiń barlyǵyn abyroımen atqara bildi», – delingen jedelhatta.
Memleket basshysy qazaqstandyqtar onyń esimi men el aldyndaǵy eńbegin árdaıym este saqtaıtynyn atap ótti.
Uzaqbaı Qaramanuly Qaramanov 1937 jyldyń 20 tamyzy kúni Qyzylorda oblysy Aral aýdanynyń Uıaly aýylynda dúnıege kelgen. QazSRO Mınıstrler Keńesiniń sońǵy tóraǵasy jáne QazSRO-nyń tuńǵysh Premer-Mınıstri.
1959 jyly Kýıbyshev (Samara) qalasyndaǵy ınjenerlik qurylys ınstıtýtyn bitirgen;
1959 - 64 jyldary Shubarqudyq avtobazasynda, «Qyzylorda qurylys» tresinde jumys istedi;
1964 - 80 jyldary «Almaty ónerkásip qurylysy» tresinde aǵa prorab, kombınat dırektory, Qazaqstan Kompartııasy OK-niń is basqarmasynyń qyzmetkeri, Jeńil jáne tamaq kásiporyndary qurylysy basqarmasynyń bastyǵy, Qazaq KSR aýyr ónerkásip mınıstrliginiń Almaty qurylys Bas basqarmasynyń jáne Qurylys ındýstrııasy Bas basqarmasynyń bastyǵy;
1980 - 84 jyldary Qazaq KSR jeńil ónerkásip mınıstrliginiń orynbasary, «Qazaqtyń sý tasqyndarynan qorǵaný qurylysy» Bas basqarmasynyń bastyǵy;
1984 - 89 jyldary Qazaq KSR qurylys mınıstrliginiń birinshi orynbasary, Qazaq KSR memlekettik jabdyqtaý komıtetiniń tóraǵasy qyzmetterin atqarǵan;
1989 - 90 jyldary Qazaq KSR Mınıstrler Keńesiniń tóraǵasy;
1990 - 92 jyldary Qazaq KSR premer-mınıstri boldy;
1991 jyldyń qazan aıynan - QR memlekettik keńesshisi;
1993 jyldyń sáýir aıynan - Araldy qutqarý Halyqaralyq qorynyń atqarýshy dırektory;
1994 jyldyń naýryz aıynan - depýtat, QR Joǵarǵy keńesi Tabıǵatty paıdalaný jáne ekologııa komıtetiniń tóraǵasy, «Qazaqstan halyqtyq kongresi» partııasynan usynylǵan;
1995 jyldyń sáýir aıynan - «Qazkontrakt» respýblıkalyq kelisimshart korporasııasynyń vıse-prezıdenti;
1998 jyldyń sáýir aıynan - «Qomaq-Invest» qarjylaı-kásipshilik tobynyń prezıdenti. Onymen bir mezgilde - QR Qurylysshylar odaǵynyń prezıdenti;
1999 jyldyń qazan aıynan - QR Parlamenti Májilisi 2-shi shaqyrylymynyń depýtaty (№37 Qyzylorda oblysynyń Aralmańy saılaý okrýginen, «Otan» RSP atynan). Aımaqtyq damytý jáne ekonomıkalyq qaıta qurý komıtetiniń múshesi;
2004 jyldyń qazan aıynan 2007 jylǵa deıin - QR Parlamenti Májilisi 3-shi shaqyrylymynyń depýtaty; QazKSR Joǵarǵy Keńesiniń 11-shi, 12-shi, 13-shi shaqyrylymdarynyń depýtaty;
Qazaqstan Qurylysshylar odaǵynyń negizin salýshy. II dárejeli «Barys», Eńbek Qyzyl Tý ordenderimen; QazKSR Joǵarǵy Keńesiniń medaldarymen, Qazaqstan Respýblıkasynyń mereıtolyq medaldarymen, QazKSR Joǵarǵy Keńesiniń qurmet gramotalarymen marapattalǵan. KSRO Mınıstrler keńesi syılyǵynyń, Eýropa qorshaǵan ortany qorǵaý oblystyq «Altyn globýs» syılyǵynyń laýreaty.
Qyzylorda oblysynyń Qurmetti azamaty.
