«Ǵylym ordasy» MQK jáne ál-Farabı atyndaǵy QazUÝ-niń Tarıh, arheologııa jáne etnologııa fakýltetiniń qoldaýymen ótkizilgen basqosýda tanymal ǵalymdar, QR UǴA akademıkteri Serik Qırabaev, Ýálıhan Qalıjan, QR Prezıdenti arhıviniń dırektory, tehnıkalyq ǵylymdar doktory Borıs Japarov, ál-Farabı atyndaǵy QazUÝ-diń Tarıh, arheologııa jáne etnologııa fakýltetiniń dekany Meńdigúl Noǵaıbaeva, professorlar Q.Jumaǵulov, N.Muqamethanuly, B.Káribaev, sondaı-aq, QazQyzPÝ, Abaı atyndaǵy QazUPÝ, QR Ulttyq kitaphanasynyń jáne Almaty qalasy ǵylymı qaýymdastyǵynyń ókilderi, «Ádilet» tarıhı-aǵartý qoǵamy tóraǵasynyń orynbasary, jazýshy Beıbit Qoıshybaev, «Aq jol» demokratııalyq partııasy Almaty fılıaly Keńesiniń múshesi A.Jumádil, ǵylymı-zertteý ınstıtýttarynyń ǵalymdary, magıstranttary men doktoranttary qatysty.
Dóńgelek ústel aıasynda QR Prezıdenti muraǵaty 1928-1940 jyldardaǵy qundy tarıhı qujattar kórmesin, «Ǵylym ordasynyń» ortalyq ǵylymı kitaphanasy latyn qarpindegi sırek kitaptar kórmesin uıymdastyrdy. Sh.Ýálıhanov atyndaǵy Tarıh jáne etnologııa ınstıtýtynyń dırektory, professor Zııabek Qabyldınov óz sózinde: «QR Prezıdenti Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasynda Qazaqstannyń álemdegi eń damyǵan 30 eldiń qataryna qosylý úshin, myqty, ári jaýapkershiligi joǵary Birtutas ult bolý úshin rýhanı jańǵyrýymyzǵa, ulttyq biregeıligimizi saqtaýymyzǵa jón siltep otyr. Rýhanı jańǵyrýǵa nyq qadam jasap, bolashaqqa senimmen bet alý úshin aldaǵy ýaqytta qolǵa alatyn mindetterdi de saralap berdi. Olardyń arasynda taıaý jyldary júzege asyrýǵa kirisetin naq jobalardyń arasynda – qazaq jazýyn latyn árpine kóshirý máselesi. Elbasymyz «Latynshaǵa kóshýdiń tereń logıkasy bar. Bul qazirgi zamanǵy tehnologııalyq ortanyń, kommýnıkasııanyń, sondaı-aq, HHI ǵasyrdaǵy ǵylymı jáne bilim berý prosesiniń erekshelikterine baılanysty» dep kórsete kele, maqalasynda qazaq álipbıiniń jańa grafıkadaǵy biryńǵaı standartty nusqasyn qabyldaý, eki jyl merzim aralyǵynda osy máselege qatysty uıymdastyrý jáne ádistemelik jumystar júrgizýdi júktegen edi. Sondyqtan elimizdiń rýhanı jańǵyrýynyń negizi bolyp tabylatyn latyn álipbıine qatysty halyq arasynda keńinen túsindirý jumystaryn júrgizip, qoldaý bildirý qaı-qaısymyzdyń da paryzymyz» dedi.
Jıynǵa jınalǵandar jahandaný úrdisindegi latyn álipbıiniń qoldanys aıasynyń mańyzy, latyn álipbıine kóshý joldary men engizý joldary, tarıhı tamyrlary men álemdik tájirıbesi, latyn álipbıiniń múmkindikteri men bolashaǵy týrasyndaǵy máselelerdi talqylaı otyryp, latynǵa kóshý jónindegi prezıdenttik bastamaǵa tolyqtaı qoldaý kórsetetinderin jetkizdi, sondaı-aq, jańa álipbıde paıdalanylatyn áripterdi durys tańdaý jónindegi óz usynystary men tilekterin ortaǵa saldy.
Mıra Baıbek,
«Egemen Qazaqstan»
ALMATY
