Jýyrda «Urpaqtar jalǵasy: otbasym – baqyt mekenim» atty shara ótti. Astana qalasyndaǵy №74 mektep-gımnazııasy uıymdastyrǵan jıynda otbasylyq eńbek ótili 100 jyldan asqan ustazdar marapattaldy. Olardyń qatarynda áýlettiń eńbek ótili 341 jyldy quraıtyn №54 mektep-lıseıdiń bastaýysh synyp muǵalimi, Ybyraı Altynsarın atyndaǵy tósbelgi ıegeri Gúlbarsha Búrkitbaıqyzy, áýlettiń eńbek ótili 327 jylǵa jetken №38 mektep-lıseıdiń matematıka páni muǵalimi Baıtemir Dilbar sııaqty 10-nan astam bilim qyzmetkerleri bar. Sondaı-aq jumys ótili 20 jyldan asatyn jáne eńbekti endi bastasa da qyzmetinde belsendilik tanytyp júrgen birneshe mamandar da nazardan tys qalmady.
Osy rette eńbek ótili 341 jylǵa jetken muǵalimder áýletiniń ókili, Ybyraı Altynsarın atyndaǵy tósbelgi men «Ulaǵatty ustaz» medaliniń ıegeri jáne Astana qalasy ákiminiń grantyna ıe bolǵan Gúlbarsha Búrkitbaıqyzynan ustazdyq kásiptiń syryn suraǵan edik.
«Ustazdyq jolda atqarǵan adal eńbek eshqashan baǵasyz qalmaıdy. Bul mamandyqty jaqsy kóre bilý kerek. Men áli de bolsa súıikti kásibimdi jalǵastyryp, ultymyzdyń uly tálimimen ushtasatyn pedagogıkalyq tárbıeni shákirtterime bersem deımin. О́ıtkeni, muǵalim bolý meniń bala kúngi armanym edi. Ákem men anamnyń ekeýi de ustaz bolǵandyqtan solarǵa qarap boı túzep, muǵalim bolsam degen muratqa talpyndym. Ákem án sabaǵyn oqytsa, anam bastaýysh synyp muǵalimi boldy. 1992 jyly men de bala kúngi armanyma jettim. Meniń atam 1910 jyly dúnıege kelgen. 1934 jyly Mońǵolııa Halyq Respýblıkasyndaǵy eń alǵashqy qazaq mektebin ashyp, ózi sol mektepte jumys istep, 1964 jyly Mońǵolııanyń «Halyq muǵalimi» ataǵyn alǵan. Ol kisi pedagogıka salasynda 48 jyl qyzmet etti. Atamyzdan bastap búginge deıin áýletimizdegi 12 adam osy mamandyqtyń ıesi atanyp otyr. Olardyń ishinde ekeýi Mońǵolııa memleketindegi mektepte biri dırektor, biri oqý isiniń meńgerýshisi bolyp isteıdi. Bir sińlim Shahtınsk qalasynda oqý isiniń meńgerýshisi, bir aǵam Astana qalasyndaǵy №40 mektepte eńbek jáne sýret pániniń muǵalimi, taǵy bir aǵam orys tili jáne ádebıeti páninen sabaq berse, 44 jyldyq eńbek ótili bar atam – fızıka-matematıka pániniń muǵalimi, al enem hımııa-bıologııa pániniń muǵalimi bolyp eńbek etken. О́zimniń eki ulym bar. Úlken ulym Máskeýde áskerı ýnıversıtette bilim alýda. Kenjemiz elordadaǵy Qazaq ulttyq óner ýnıversıtetinde 3-kýrsta oqyp júr. Kenje ulymyz da ustazdyq joldy jalǵastyrady dep senemiz», dedi Gúlbarsha Búrkitbaıqyzy.
Atalǵan sharaǵa Astana qalasy bilim basqarmasynyń basshysy Ánýar Janǵozın, Qazaqstan kásipodaqtary qaýymdastyǵy tóraǵasynyń orynbasary Aıgúl Muqasheva, Astana qalasy bilim qyzmetkerleriniń «Ádilet» kásipodaǵynyń tóraıymy Balsulý Naýryzbaeva qatysyp, aq tilekterin aqtardy. Alǵys hatqa ıe bolǵan árbir muǵalimge aqshalaı syıaqy tabys etildi.
Raýan QAIDAR,
«Egemen Qazaqstan»
