Bıyl «Úzdik mektep» atalymynda №3 mektep-gımnazııasy jeńimpaz atandy. Al «Úzdik mektep aldy daıarlyq uıymy» — №37 «Arman» balabaqshasy; «Úzdik qosymsha bilim berý mekemesi — Balalar kórkemsýret mektebi; «Úzdik kolledj» — Gýmanıtarlyq kolledj; «Úzdik arnaıy bilim berý mekemesi» atalymymen №1 psıhologııalyq-pedagogıkalyq túzeý kabıneti marapattaldy.
Saltanatty shara «El bolashaǵy – bilimde» atty merekelik konsertke ulasty. Jyldaǵy dástúrge saı birneshe atalym boıynsha Astana ákiminiń granty tapsyryldy.
«Ár adamnyń ómirinde mektepte on bir jyl boıy bilim nárimen sýsyndatqan ustazdardyń alatyn orny erekshe. Sizder Astananyń, jalpy Qazaqstannyń damýyna, urpaq tárbıesine úlken úles qosyp kele jatyrsyzdar. Qala ákimdigi de jyl saıyn bilim berý uıymdaryn qarjylandyrýdy ulǵaıtyp keledi. Máselen, bıyl byltyrǵyǵa qaraǵanda, ár mekteptiń bıýdjeti eki esege ósti. Mektepter robototehnıka sııaqty jańa zaman tehnologııalarymen jaraqtandyrylýda. Kelesi jyldyń aıaǵyna deıin barlyq orta bilim berý orny «smart mektepke» aınalady. Ár synypqa Wi-Fi júıesi tartylady» dedi ustazdardy Astana ákiminiń atynan quttyqtap, grant tapsyrǵan qala basshysynyń orynbasary Malıka Bekturova.
QR Bilim jáne ǵylym mınıstrligi balalardyń quqyqtaryn qorǵaý komıteti basshysynyń mindetin atqarýshy Ersaıyn Erjan ustazdardy sala mınıstri atynan quttyqtap, bir top muǵalimge «Qazaqstan Respýblıkasy bilim berý isiniń qurmetti qyzmetkeri» jáne «Y. Altynsarın» tósbelgilerin tapsyrdy.
Sonymen qatar Nazarbaev Zııatkerlik mektepteriniń tájirıbesin jáne jańartylǵan bilim berý mazmunyn, halyqaralyq bilim berý standarttaryn engizýde aýqymdy jumys júrgizgen 19 elordalyq mektep marapattaldy.
