Memleket basshysy Nursultan Nazarbaevtyń 2016 jylǵy aqpan aıynda Ortalyq atqarýshy organdar basshylarynyń, ákimderdiń, ulttyq joǵary oqý oryndarynyń halyq aldyndaǵy ashyqtyǵyn, jaýaptylyǵyn, eseptiligin arttyrý maqsatynda qol qoıǵan Jarlyǵyna sáıkes ótip otyrǵan atalmysh esep berý jıynyna Almaty qalasy ákimdigi men máslıhatynyń, Medeý aýdanynyń joǵary oqý oryndary men bilim berý mekemeleriniń basshylary, QR UǴA músheleri, ǵylymı qaýym, jumys berýshiler men ýnıversıtet túlekteri, shetel konsýldyqtary men kompanııalarynyń ókilderi, bilim alýshylar men olardyń ata-analary qatysty.
Otandyq pedagogıkalyq ǵylym men mádenıettiń qara shańyraǵy sanalatyn, kelesi jyly 90 jyldyq mereıtoıyn ýnıversıtet deńgeıinde ǵana emes, respýblıka deńgeıinde atap ótkeli otyrǵan, óz tarıhynda 250 myńnan astam túlek ushyrǵan QazUPÝ-da búgingi tańda 7 myńǵa jýyq stýdent bilim alyp jatqanyn aıta ketken jón. 2017 jyly alǵash ret álem ýnıversıtetteriniń TOP-500 qataryna jáne QS World University Ranking reıtınginde álemniń úzdik 491 ýnıversıtetiniń qataryna engen, ulttyq reıtıngter boıynsha pedagogıkalyq joǵary oqý oryndary arasynda aldyńǵy oryndy ıelenip kele jatqan Abaı atyndaǵy QazUPÝ elimizde pedagogıkalyq kadrlar daıyndaýda oqý-ádistemelik jáne ǵylymı-ádistemelik qamtamasyz etý ortalyǵy bolyp tabylady. Pedagogıka ǵylymdarynyń doktory, professor Takır Ospanuly ózi basqaryp otyrǵan irgeli oqý ordasynyń bir jyl ishinde qol jetkizgen jetistikteri jaıly aıta kele: «Elbasymyz óziniń «Qazaqstannyń úshinshi jańǵyrýy: jahandyq básekege qabilettilik» atty Joldaýynda «Eń aldymen, bilim berý júıesiniń róli ózgerýge tıis. Bizdiń mindetimiz – bilim berýdi ekonomıkalyq ósýdiń jańa modeliniń oratlyq býynyna aınaldyrý. Oqytý baǵdarlamalaryn bilim alýshylardyń synı oılaý qabiletin jáne óz betimen izdený daǵdylaryn damytýǵa baǵyttaý qajet, IT-bilimdi, qarjylyq saýattylyqty qalyptastyrýǵa, ultjandylyqty damytýǵa basa kóńil bólý kerek» degen edi. Ulttyń básekege qabilettiligi eń aldymen onyń bilimimen anyqtalady. Demek, pedagog mamandardy daıyndaýda sapaly jańa úrdis qajet», – dedi.
Respýblıka kóleminde pedagog mamandardy qalyptastyrý baǵytynda aýqymdy jumystar atqaryp otyrǵan bilim ordasy sapaly kadrlar daıarlaý úshin tabandylyqpen eńbek ete beretinin, oǵan ýnıversıtet ǵalym-pedagogtarynyń múmkindigi tolyq jetetinin nyq senimmen aıtqan QazUPÝ basshysy jalpy sany 883 adamdy quraıtyn professor-oqytýshylardyń ishinde 157 ǵylym doktory, professor, 369 ǵylym kandıdatynan ózge, 14 QR UǴA akademıgi men korrespondent-múshesi, basqa da qoǵamdyq akademııalardyń 45 akademıgi, shyǵarmashylyq odaqtardyń 19 múshesi, 6 eńbek sińirgen jattyqtyrýshy, 12 sport sheberi jumys isteıtinin atap ótti.
Álemdik bilim berý keńistigindegi qazaqstandyq bilimniń mártebesin nyǵaıtý maqsatynda ýnıversıtet qabyrǵasynda jyl basynan beri alys jáne jaqyn shetelden kelgen 75 ǵalym dáris oqyp, sheberlik-synyptaryn ótkizýmen birge, «Sorbonna–Kazahstan» ınstıtýty jáne QazUPÝ-dyń professor-oqytýshylar quramyndaǵy 23 oqytýshy Parıj qalasyndaǵy Sorbonna ýnıversıtetinde biliktilikterin arttyryp qaıtqan.
Taǵy bir aıta keterligi, bıyldan bastap elimizdegi eń ózekti máselelerdiń biri sanalatyn latyn álipbıine kóshý ekenin, sonymen qatar, mektep jáne JOO oqýlyqtarynyń basym kópshiliginiń avtorlary atalmysh oqý ornynyń professorlary ekenin eskersek, rektor ýnıversıtet ǵalymdarynyń aldynda turǵan basty mindetterdiń biri – orta mektep oqýlyqtarynyń jańa qurylymy men mazmunyn anyqtaý úshin Ońtústik Koreıa, Japonııa, Sıngapýr, Fınlıandııa sııaqty álemniń úzdik bilim berý júıeleri men jetekshi baspalarynyń tájirıbesi men oqýlyqtaryna taldaý jasaýdy iske asyrý ekenin jetkizdi.
Jınalǵan qaýymǵa ýnıversıtet jaıynda kóptegen tyń maǵlumattardy tanystyryp ótken Takır Ospanuly kezdesý sońynda stýdentterdi, ata-analardy tolǵandyrǵan saýaldarǵa jaýap berdi.
Mıra Baıbek,
«Egemen Qazaqstan»
ALMATY
