Túrkeshtiń «Kóńil ashar» kúıimen bastalǵan óner merekesi kórermenge erekshe áser syılady. Oblysymyzdaǵy Dına Nurpeıisova atyndaǵy akademııalyq halyq aspaptar orkestrine dırıjerlik etken Arman Júdebaevtyń shyǵarmashylyq sheberligi atyraýlyqtardy tánti etti. Qurmanǵazy men Dınanyń, Yqylastyń, Nurǵısa Tilendıev pen Aıtqalı Jaıymovtyń, Qarshyǵa Ahmedııarovtyń kúıleri Jaıyq jaǵasynda saltanat qurdy. Shetel klassıkteriniń shyǵarmalarymen birge, otandyq kompozıtorlardyń ánderi de oryndaldy. Orkestrdiń súıemeldeýimen konsertke kelgen kórermen qosyla án shyrqady.
Sharaǵa qatysqan oblys ákimi Nurlan Noǵaev «Búginde Qurmanǵazy orkestriniń alǵashqy qarlyǵashtary, eń birinshi dombyrashylarynyń jolyn jańa býyn jalǵap keledi. Solardyń arasynda Arman Júdebaevtyń da esimi maqtanyshpen aıtylady» dep atap ótti.
Belgili dırıjer Atyraýǵa sapary aıasynda aımaqtaǵy halyq aspaptar orkestrleriniń kórkemdik jetekshileri men dırıjerlerine sheberlik sabaqtaryn ótkizip, tájirıbesimen bólisti.
Baqytgúl BABASh,
«Egemen Qazaqstan»
