Sýret: gov.kz
Byltyr syrttaı formatta 113,1 myń ótinim qaralyp, kýálandyrýdan ótken múgedektigi bar adamdardyń 42,5%-yn qamtydy. Syrttaı proaktıvti kýálandyrý birqatar nozologııalyq nysanda qoldanylady. Olardyń qataryna onkologııalyq aýrýlar, barlyq lokalızasııadaǵy týberkýlez, týa bitken, sonymen qatar júre paıda bolǵan anatomııalyq damý kemistikteri, psıhıkalyq aýrýlar, balalardaǵy birinshi tıpti qant dıabeti, balalardaǵy mýkopolısaharıdoz, sondaı-aq aǵza transplantasııasynan keıingi jaǵdaılar kiredi.
Eńbek jáne halyqty áleýmettik qorǵaý mınıstrliginiń málimetinshe, byltyr nozologııalyq nysandar tizbesi edáýir keńeıtilip, gıdrosefalııa, aıaq-qoldyń saldanýy sııaqty aýrýlar engizildi. Osylaısha, qazirgi tańda syrttaı formattaǵy kýálandyrý 50-den astam nozologııalyq nysanda júrgiziledi.
Kezinde Ulttyq qoǵamdyq senim keńesinde Memleket basshysy Q.Toqaev erekshe qajettilikteri bar adamdarǵa barynsha qolaıly jaǵdaı jasaýdy, olardy ınstansııalarmen, qaǵazbastylyqpen áýrelemeı, kórsetiletin qyzmetti berýshilerdiń qyzmet alýshylarmen baılanysyn boldyrmaýdy tapsyrdy. Tapsyrmany júzege asyrý maqsatynda elimizde medısınalyq-áleýmettik saraptamanyń syrttaı formaty engizildi. Bul jaǵdaıda ótinish berýshige tek tirkelgen jerindegi medısınalyq uıymǵa júginip, qajetti tekserýden ótý jetkilikti. Qujattardy joldaýdan bastap saraptamalyq sheshim shyǵarýǵa deıingi barlyq keıingi kezeń azamattyń jeke qatysýynsyz, aqparattyq júıelerdiń ıntegrasııasy arqyly júzege asyrylady. Medısınalyq qujattar uıymdardan MÁS bólimshelerine elektrondyq formatta joldanady.
Syrttaı kýálandyrýǵa kóshý nátıjesinde ákimshilik, bıýrokratııalyq kedergilerdi joıýdyń múmkindigi artady. MÁS saraptamalyq sheshimderiniń ashyqtyǵyn qamtamasyz etedi. Múgedektikti belgileý men múgedektigi bar adamdardy áleýmettik qorǵaý sharalaryn anyqtaýdy úıden shyqpaı-aq alýǵa múmkindik beredi. Osylaısha, sybaılas jemqorlyq táýekelderi azaıady.
