О́zbekstanda resmı emes derekterde bir mıllıonnan astam etnostyq qazaqtar turady delinedi. Al ózbek halqynyń bes júz myńǵa jýyǵy Qazaqstan jerin jaılap jatyr. Bar turmystyq jaǵdaıy kelisken, ózbek tilinde mektepteri, drama teatry bar dıaspora ókilderi osyndaı memlekettik qamqorlyq úshin Elbasyna únemi rahmetin aıtyp otyrady.
Jaqynda Qazaqstan halqy Assambleıasy Ońtústik Qazaqstan oblystyq fılıalynyń uıymdastyrýymen О́zbekstanǵa jol tartqan «Dostyq kerýeni» ońtústikke oraldy.
– Bul sapar О́zbekstan Respýblıkasynyń prezıdenti Shavkat Mırzııoevtiń naýryz aıynda Qazaqstanǵa jasaǵan resmı sapary kezinde Qazaqstan halqy Assambleıasy men О́zbekstan ınternasıonaldy mádenı ortalyǵynyń arasynda túzilgen yntymaqtastyq týraly memorandým aıasynda uıymdastyrylyp otyr. Memorandým eki el arasyndaǵy mádenı yqpaldastyqty arttyryp, Qazaqstan halqy Assambleıasy men О́zbekstan ınternasıonaldy mádenı ortalyǵynyń áriptestigin nyǵaıtýdy kózdeıdi. Sonyń aıasynda etnosaralyq birlikti qamtamasyz etip otyrǵan uıymdardyń qos elge etnosaıahat uıymdastyrýyna múmkindik berip otyr. «Dostyq kerýeni» Ońtústik Qazaqstan oblysy Qazaqstan halqy Assambleıasynyń uıymdastyrýymen О́zbekstanǵa ekinshi ret jol tartty. Dostyq nıettegi ózbekstandyq delegattar da Ońtústik Qazaqstan oblysynyń tarıhı oryndaryna saıahattar uıymdastyrýda, – deıdi kerýendi bastap barǵan oblys ákimi apparatynyń «Qoǵamdyq kelisim» KMM basshysy Erbol Baıqonaqov.
Quramynda oblystyń zııaly qaýymy, eńbek ardagerleri, etno-mádenı ortalyq tóraǵalary men BAQ ókilderi bar kerýen О́zbekstanda kórshi eldiń tarıhı-mádenı oryndaryn aralady. Sapar basyn Tashkenttegi Tóle bı kesenesindegi uly árýaqtarǵa zııarat etýden bastaǵan azamattar Samarqandaǵy áıgili Regıstan tarıhı-sáýlettik keshenimen tanysyp, Shahı-Zında tarıhı kesheninde jerlengen О́zbekstannyń eks-prezıdenti Islam Karımovtiń rýhyna Quran aıattaryn baǵyshtady.
Buharadaǵy Bahaýaddın Nakshbandı mavzoleıin aralap kórdi.
– О́zbekstan jerinde qazaqtyń aıtýly eki bıi Tóle bı men Áıteke bıdiń áz denesi máńgi demalyp jatyr, – deıdi Qazaqstan halqy Assambleıasy Ońtústik Qazaqstan oblystyq fılıaly tóraǵasynyń orynbasary Muratáli Qalmuratov. – Eki týysqan eldiń tamyry bir alyp báıterekten taraıtyndyǵy Qadyr aqyn aıtqandaı «tarıhy qalyń bolsa da oqýlyǵy jup-juqa» ótken dáýirlerden belgili. Sapar barysynda ózbek aǵaıyndardan túbi bir týysqanǵa degen jylýdy aıqyn sezindik. Olar Memleket basshysy Nursultan Nazarbaevtyń álemde orny erek qaıratker ekendigin, dúnıe júzinde beıbitshilikti saqtaýda eren eńbek etip júrgenin súısinishpen aıtady. Biz de óz kezegimizde baýyrlarymyzǵa jaqsy tilekter tiledik. Bir kezderi О́zbekstannyń alǵashqy prezıdenti Islam Karımov «Qazaqpen birge júrseń adaspaısyń» degen ǵıbratty sóz aıtyp edi. Sol izgi tilek eki el arasyn burynǵydan beter jaqyndatyp keledi.
«Dostyq kerýeni» osylaısha jaqsy nıetke qyzmet etip jatyr.
Baqtııar TAIJAN,
«Egemen Qazaqstan»
Ońtústik Qazaqstan oblysy
