Búgingi almaǵaıyp ýaqytta bireýler úshin ádebıetpen shuǵyldaný, sóz qurylymy men stılin zertteý – ýaqyt pen eńbektiń zaıa ketýi bolyp esepteletin shyǵar. Árkimniń sana-sezimi árqandaı bolsa da, bárine ortaq bir túsinik baryn anyq bilemin. Sóz ben stıldi zertteý zaıa eńbek dep oılaıdy.
Biraq men qandaı adam bolsyn, kórkem oılasyn, ıa oılamasyn, myna dúnıede kúndelikti tirshilikten basqa da uǵymdar bar ekenin bir sát bolsa da oılaıtyndaryna sengim keledi.
Men oqýǵa shaqyrǵan, osylaı túsinýge bolady dep shamalaǵan romandar sizderdiń kúndelikti turmystaryńyzǵa qajet ilimdi úıretpeıdi. Ofıstik qyzmetińizde de, áskerı jıyndarda da, as úı men balalar bólmesinde de kádeńizge jaramaýy ábden múmkin. Sizder qabyldaýǵa, men túsindirýge tyrysqan bilim – ásemdik. Saıasatty da, áıel men bozbalanyń júregin túsinýge de sep bola almaıtyn ásemdik. Biraq meniń aıtqan erejelerimdi saqtasańyzdar shyn ónerden týǵan shabyt qýanyshyn sezip, estetıkalyq lázzat alýǵa qol jetkizer edińizder. Álem ádebıetiniń klassıkteri týraly leksııalarym arqyly men ǵajaıyp oıynshyqtardyń tetigin tapqym keldi. Sizder naǵyz oqyrman bolsa dep armandadym. Kitapty bala sııaqty qaharmandarmen jarysý úshin emes, ýnıversıtetten ıa ómirden jalyǵyp, basqa álemdi qyzyqtaǵysy keletin stýdentterge tán qııalılyqpen de emes, ómir men ónerdiń ara-qatynasyndaǵy názik tinderdi sonshalyqty tereń túsinip, túısinetin qabiletpen oqıtyn dárejege jetkizgim keldi. Sizderge kitaptyń formasyn, mazmunyn, jazý ónerin túsindirýge tyrystym. Kitaptyń aınalasy týraly aıtqan joqpyn. Ár romannyń júrek qaǵysy týraly jyrladym.
Bireýińiz bul sózimdi uǵyp, bireýińiz tyńdamaıtyn da shyǵarsyzdar. Úlken ómirge aralasqan sátten birińiz uly romandardy oqýdy jalǵastyryp, endi birińiz múlde kitap betin ashpaıtyn bolasyzdar. Al sóz sheberleriniń kitaptaryn eshqashan túsinbeı ótetin shyǵarmyn dep oılaıtyndaryńyz, múlde kitap oqymaı-aq qoıǵandaryńyz abzal. Odan qyzyq taýyp, lázzat almasańyzdar bári beker. Basqa da salalardyń óz qyzyǵy bar ǵoı.
Biraq ǵylym men ónerdiń qyzyǵy eshqashan teń kele almaıdy. О́ner – bıik. Eger sony sezine almasaq, ómirdiń bir ǵanıbetinen quralaqan qalamyz.
Vladımır Nabokov
Aýdarǵan
Baǵashar TURSYNBAIULY,
«Egemen Qazaqstan
