«Shyǵysqa kelýdegi maqsatymyz – jastarmen kezdesý, olardy Tuńǵysh Prezıdent qorynyń jobalarymen jáne granttarymen keńinen tanystyrý. Bizde jastarǵa arnalǵan baǵdarlamalar men áleýmettik jobalar óte kóp. Osy baǵdarlamalar men jobalarǵa shyǵysqazaqstandyq jastar da belsendi túrde qatyssa deımiz. Keıde jastardyń jaqsy ıdeıalary bolǵanymen, qarjynyń joqtyǵynan ol ıdeıa sol kúıinde qalyp qoıady. Al bul – ıdeıany iske asyrýǵa beriletin úlken múmkindik», deıdi ol.
Bıyl qordyń ókilderi Qaraǵandy, Shymkent, Kókshetaý jáne Taldyqorǵan qalalarynda bolyp, talantty jastardyń jobalaryn iske asyrýǵa jan-jaqty qoldaý kórsetipti. Shyǵys Qazaqstan oblysynan 24 adam, ıaǵnı jas ǵalymdar men stýdentter qordyń grant ıegeri atanypty. О́z kezeginde óńir basshysy Tuńǵysh Prezıdent qorynyń oblysqa qatysty barlyq jobalary men bastamalaryn qoldaıtynyn, birlese jumys isteýge daıyn ekendigin jetkizdi. Sondaı-aq kezdesý barysynda qordyń atqarýshy dırektory Úrjar aýdanynyń balalarǵa arnalǵan arnaıy áleýmettik qyzmet kórsetý ortalyǵyna ınteraktıvti jabdyq satyp alýy úshin 3,7 mıllıon teńgeniń sertıfıkatyn oblys ákimine tabys etti. «Bul árıne, úlken qýanysh. Bizdiń áleýmettik mekemeniń tarıhynda buryn-sońdy bolmaǵan oqıǵa. Sondyqtan da Qazaqstan Respýblıkasy Tuńǵysh Prezıdenti – Elbasy qorynyń basshylyǵyna zor alǵysymyzdy aıtamyz», deıdi Úrjar aýdanynyń balalarǵa arnalǵan arnaıy áleýmettik qyzmet kórsetý ortalyǵynyń dırektory Aıjan Muhamadıeva.
Qor ókilderi budan keıin D.Serikbaev atyndaǵy Shyǵys Qazaqstan memlekettik tehnıkalyq ýnıversıtetinde joǵary oqý oryndarynyń stýdentterimen kezdesti. Qanat Jumabaev qordyń jastarǵa arnalǵan baǵdarlamalaryn qarapaıym tilmen, naqty mysaldarmen túsindirip berdi. Qordyń qoldaýynyń arqasynda búginde kóptegen qazaqstandyq jastardyń álemge áıgili Býkıng, Feısbýk sekildi halyqaralyq kompanııalarda jumys istep júrgenin aıtty. Jýyqta qor janynan IT-keńes qurylypty. «Elbasy bıylǵy Joldaýynda «Sıfrly Qazaqstan» baǵdarlamasy jóninde bekerden bekerge aıtqan joq. Prezıdenttiń «Bolashaqqa baǵdar: rýhanı jańǵyrý» maqalasynda aıtylǵan «Maqsatqa jetý úshin bizdiń sanamyz isimizden ozyp júrýi, ıaǵnı odan buryn jańǵyryp otyrýy tıis» degen sóziniń astarynda tereń maǵyna jatyr. Búginde álemde ne bolyp jatyr? Dúnıe júzi jedel qarqynmen damyp barady. 5-10 jylda álem adam tanymastaı ózgeredi. Bul ózgeristerge biz daıyn bolýymyz kerek. Búginde dúnıe júzindegi ǵylymı eńbekterdiń 90 paıyzy aǵylshyn tilinde.
Latyn qarpine kóshýdiń mańyzdylyǵy da osynda. «El ishi – óner kenishi» degendeı, talantty da talapty jastar el ishinde eleýsiz qalyp qoımasa deımiz. Elimizdi alǵa súıreıtin, memlekettiń mereıin asyratyn jaqsy ıdeıa bolsa, biz qashanda qoldaýǵa daıynbyz. Astanaǵa kelińizder, árqaısylaryńyzben jumys isteýge, úıretýge, kórsetýge ázirmiz. Esigimiz árkez ashyq», dedi qordyń atqarýshy dırektory. Tuńǵysh Prezıdent Elbasy Qorynyń janyndaǵy jas ǵalymdar keńesi tóraǵasynyń orynbasary Sýhrab Japarov qordyń jastarǵa qatysty baǵdarlamalaryn jan-jaqty túsindirip, stýdentterdi IT-jobalarǵa belsendi qatysýǵa shaqyrdy. «Búginde dúnıe júzinde suranysqa ıe mamandyqtardyń kópshiligi IT-tehnologııalarǵa qatysty. Bizdiń qordyń jobalaryna osy ýnıversıtettiń stýdentteri de qatysyp, grant ıegeri atandy. Sondyqtan batyl bolyńyzdar. Birinshisinde bolmasa, ekinshisinde bolady», dedi ol.
Sonymen qatar bul kúni qordyń syılyǵynyń laýreaty, Jambyl atyndaǵy Qazaq memlekettik fılarmonııasynyń solısi, «Qazaqstannyń altyn vıoloncheli» Ermek Qurmanaev aǵaıyndy Abdýllınder atyndaǵy Shyǵys Qazaqstan óner ýchılıshesiniń ishekti aspaptar bólimshesiniń stýdentterine sheberlik sabaǵyn ótkizip, jas mýzykanttarmen pikir almasty. Tuńǵysh Prezıdent qorynyń О́skemendegi is-sharalary Metallýrgterdiń mádenıet saraıynda belgili barıtondar Súndet Baıǵojın, Azamat Jyltyrgózov, halyqaralyq jáne respýblıkalyq baıqaýlardyń laýreattary Gaýhar Tasbergenova, Tatıana Vısınskaıa, Bolat Esimhan men Ermek Qurmanaevtyń qatysýymen ótken konsertpen túıindeldi. Erkin formattaǵy konsertte ónerpazdar án aıtýmen qatar kórermendermen suhbattasýǵa da ýaqyt taýyp, qordyń kómegi arqyly búgingideı bıikke qalaı jetkendikterin áńgimelep berdi. «Shyǵys Qazaqstan – meniń júregime óte ystyq. О́ıtkeni meniń áke-sheshem osy jaqtan.
Al Tuńǵysh Prezıdent qory týraly aıtatyn bolsam, 2010 jyly Fınlıandııada ótetin baıqaýǵa barý úshin qorǵa tapsyrys berip, grantyn utyp alǵan bolatynmyn. Sol baıqaýdan júldeli oryn alyp keldim. Sondaı-aq osydan eki jyl buryn osy qordyń laýreaty atandym. Qazir ózim tárbıelep jatqan shákirtterim de osy qordyń stıpendıanttary atanyp, klassıkalyq mýzyka ónerin nasıhattap júr», deıdi Qazaq ulttyq óner ýnıversıtetiniń professory Azamat Jyltyrkózov.
Azamat QASYM,
«Egemen Qazaqstan»
О́SKEMEN
