Aıtýly mereke Prezıdent N.Nazarbaevtyń «Qazaqstannyń áleýmettik jańǵyrtylýy: Jalpyǵa Ortaq Eńbek Qoǵamyna qaraı 20 qadam» atty maqalasynda berilgen tapsyrmalardy iske asyrý maqsatynda Elbasy Jarlyǵymen bekitilgen «Eńbek kúnine» oraı uıymdastyrylǵan bolatyn. Al forýmǵa Parlament depýtattary men Prezıdent Ákimshiligi, Úkimet, ortalyq jáne jergilikti atqarýshy organdar, halyqaralyq uıymdar, bıznes-qoǵamdastyq pen kásipodaqtar ókilderi qatysty.
Forýmdy ashqan Gúlshara Ábdiqalyqova Memleket basshysynyń «Bolashaqqa baǵdar: rýhanı jańǵyrý» atty baǵdarlamalyq maqalasynda «Qazirgi tańda tek jeke adam emes, tutas halyq básekelik qabiletin arttyrsa ǵana tabysqa jetýge múmkindik alady», dep atap ótkenin aıtty.
«Negizinen, bul mereke Otanymyzdyń ósip-órkendeýin qamtamasyz etetin halyqtyń eńbegine degen qurmettiń bir belgisi. Oǵan qosa, bul kún áleýmettik-ekonomıkalyq jetistikterdi dáripteýge arnalǵan. Elimizdiń árbir azamaty adal, rııasyz, nátıjeli eńbektiń mańyzdylyǵyn sanasyna sińirýi tıis. Sonda ǵana Qazaqstan álemdegi damyǵan otyz eldiń qataryna qosylady. О́ıtkeni keleshekte ulttyń tabystylyǵy adamı kapıtaldyń sapasymen ólshenetin bolady», dedi ol.
Sonymen qatar Memlekettik hatshy Jalpyǵa Ortaq Eńbek Qoǵamy ıdeıasynyń maqsattaryna jetkizetin birqatar memlekettik jáne salalyq baǵdarlamanyń oryndalý nátıjelerine de toqtaldy.
«Osy kúnderi memleket, jekemenshik sektor jáne kásibı birlestikter yntymaqtastyǵynyń tetikterine negizdelgen áleýmettik-eńbek qatynastarynyń jańa modeli qoldanysqa engizildi. Memlekettik jáne úkimettik baǵdarlamalar aıasynda bıyl 290 myń jumys orny ashyldy. 500-ge jýyq kásibı standarttar ázirlendi», dedi Gúlshara Ábdiqalyqova.
Memlekettik hatshy iri jáne orta kásiporyndardyń shamamen 90 paıyzynda, sondaı-aq shaǵyn kásiporyndardyń 30 paıyzdan astamynda áleýmettik-eńbek qatynastaryn retteıtin ujymdyq sharttar bar ekenin tilge tıek etip, elimizde jańa joba – tegin kásiptik bilim berý isi qolǵa alynǵanyn atap ótti. Osylaısha, jastar úshin óziniń eńbektegi alǵashqy mamandyǵyn memleket esebinen ıgerý múmkindigi paıda bolǵandyǵyn alǵa tartty.
Sodan keıin sóz alǵan Eńbek jáne halyqty áleýmettik qorǵaý mınıstri Tamara Dúısenova bul kún el ekonomıkasynyń túrli salalarynda qyzmet etip kele jatqan 8,5 mıllıonnan astam azamattardyń aıtýly merekesi ekenin aıtty.
«Elbasy óziniń «Jalpyǵa Ortaq Eńbek Qoǵamyna qaraı 20 qadam» atty baǵdarlamalyq maqalasynda álemdik órkenıettiń barlyq qundylyqtary, barlyq ekonomıkalyq jáne mádenı baılyqtar vırtýaldy qarjy ınstıtýttarynyń emes, adamnyń eńbegimen jasalady dep aıtqan bolatyn. Rasynda da egemendigimizdi alǵannan keıingi shırek ǵasyrǵa kóz júgirtetin bolsaq, osy ýaqyttyń ishinde elimizde 7,5 myń shaqyrym jol salyndy. 113 mln sharshy metrden astam turǵyn úı qoldanysqa berilse, 3 myńǵa jýyq mektep pen densaýlyq saqtaý syndy áleýmettik nysandar boı kóterdi. Al óndirilgen jalpy ónimniń kólemi 1993 jylǵy 29,4 mlrd teńgeden, ótken jylǵy qorytyndy boıynsha 47 trıllıon teńgege jetken. Osyndaı kórsetkishterge ıe Qazaqstandy álemdik qoǵamdastyq naryqtyq ekonomıkadaǵy memleket retinde moıyndap otyr», dedi T.Dúısenova.
Aıta keteıik, forým aıasynda «Eńbek joly» atty respýblıkalyq konkýrstyń jeńimpazdaryn marapattaý rásimi ótti. Oǵan 329 adam qatysqan bolatyn. Nátıjesinde, «Úzdik eńbekkerler áýleti» atalymy boıynsha Aqtóbe oblysynan temirjolshy Jubanyshevtar otbasy; «Jumys isteıtin jastardyń úzdik tálimgeri» nomınasııasy boıynsha Batys Qazaqstan oblysynan energııa kásiporny óndiristik-tehnıkalyq qyzmet bóliminiń bastyǵy Tilek Harın; «Úzdik jas qyzmetker» nomınasııasy boıynsha Ońtústik Qazaqstan oblysynan muǵalim Nursultan Abbasov; «Jas urpaqty eńbekke baýlýdaǵy úlesi úshin» nomınasııasy boıynsha Ońtústik Qazaqstan oblysynan balabaqsha meńgerýshisi Nurjamal Tóleýova jeńimpaz atandy. Sonymen qatar Qazaqstannyń qalyptasýy men damýyna úles qosqan el ekonomıkasynyń túrli salasynyń ardagerleri «Eńbek ardageri» medalimen marapattaldy.
Forým sońynda qazaqstandyq tanymal estrada ártisteriniń qatysýymen konsert ótti.
Nurlybek DOSYBAI,
«Egemen Qazaqstan»
