Bul jaıynda Ortalyq kommýnıkasııalar qyzmetinde ótken baspasóz máslıhatynda málim boldy. Jıynda Eńbek, áleýmettik qorǵaý jáne kóshi-qon komıtetiniń tóraǵasy Aqmádı Sarbasov tekserý kezinde málim bolǵan zań buzýshylyq áreketterin boldyrmaý maqsatymen eńbek ınspektorlary 4 746 nusqaýlyq bergenin jáne 360,2 mln teńgege 2 326 ákimshilik aıyppul salynǵanyn jetkizdi.
«Bir táýlikte jumys ýaqytynan tys jumys ár qyzmetker úshin eki saǵattan aspaýy kerek. Al bir aıǵa shaqqanda ol 12 saǵattan aspaýy tıis, jylyna – 120 saǵat. Eńbek zańyn buzǵan azamattar zańǵa saı jaýapkershilikke tartylatynyn aıta keteıin», dedi komıtet tóraǵasy. Spıkerdiń sózinshe, jumys berýshi jumyskerlerine qatysty eńbek shartyn buzǵan jaǵdaıda ol adamdar nemese olardyń ókilderi eńbek ınspeksııasyna shaǵymdana alady. Berilgen aryz arqyly mekeme tekserýden ótkiziledi. Zań buzýshylyq tirkelse, Qazaqstan Respýblıkasynyń zańnamasyna saı tıisti sharalar qoldanylady.
Qazaqstanda Eńbek kúni 2013 jyldan atalyp ótiletinin, 2014 jyly Memleket basshysynyń tapsyrmasymen «Eńbek eri» medali taǵaıyndalǵanyn eske salǵan Aqmádı Sarbasov atalǵan marapat 40 jyldan astam, onyń ishinde bir salada keminde 10 jyl jumys ótili bar, sondaı-aq eńbek qyzmetinde joǵary nátıjelerge qol jetkizgen qyzmetkerler men zeınetkerlik jasqa jetken adamdarǵa beriletinin aıtty. «Búgin ár saladan bir ókil «Eńbek eri» atandy. Qatelespesem, 9 adam. Bul ár salanyń, ár memlekettik organnyń tańdaýy boldy», degen ol eńbek ardagerleri de marapattaýdan shet qalmaıtynyn jetkizdi.
Ashat RAIQUL,
«Egemen Qazaqstan»
