Elbasy Nursultan Nazarbaev Qostanaıǵa saparynyń ekinshi kúni de birneshe nysandy aralady.
Prezıdent aldymen osyndaǵy sapaly sút ónimderin daıyndaıtyn «Mılh» jaýapkershiligi shekteýli seriktestigine keldi. Elbasyna munda jańa tehnologııamen óndirilip jatqan balmuzdaq jáne ashymal sút ónimderi jelisi tanystyryldy. Kásiporyn jylyna 26 myń tonna ónim shyǵarady. Bıyl sút zaýytynda balmuzdaq óndiretin seh salynyp, ınvestısııalyq jobanyń birinshi kezegi júzege asyryldy. Zaýytta 243 adam eńbek etedi.
Nursultan Nazarbaev aýylsharýashylyq ónimderin óńdeıtin tyń tehnologııaly osyndaı óńdeý kásiporyndary qatarynyń kóbeıýi kerektigin aıtty.
Sút zaýyty ǵımaratynda Memleket basshysy oblystaǵy aýylsharýashylyq kásiporyndary basshylarymen kezdesti. Ol bıyl aýa raıy kóktem men jazda asa qolaıly bolmasa da, qostanaılyq dıqandardyń joǵary ónim jınaǵanyn atap ótti. Jalpy, elimizde 21 mıllıon tonna astyq qambaǵa quıyldy.
Elbasy elimizdegi eń negizgi astyqty aımaǵyna aınalǵan Qostanaıǵa kelgen saıyn aýyl sharýashylyǵynyń ózekti máselelerin dıqandar men sharýalardyń ózimen birge ortaǵa salady. Bul joly da ol sharýashylyq basshylarynyń sýbsıdııa týraly pikirlerin tyńdady.
– Men «sýbsıdııa dıqandarǵa tolyq jete bermeıdi, oǵan ketken qarjyny nesıe túrinde bergen durys» degen pikirlerdi estip qalyp júrmin. Álde sýbsıdııany iri sharýashylyqtar tıimdi paıdalanyp, shaǵyndary olaı ete almaı ma? Pikirleriń qalaı? – dedi Memleket basshysy.
Bul saýalǵa «Altynsarın» jaýapkershiligi shekteýli seriktestiginiń dırektory, Qazaqstannyń Eńbek Eri Borıs Knıazev óz pikirin bildirdi.
– Mal sharýashylyǵy memlekettik kómekti qajetsinedi. Menińshe sýbsıdııany eginniń gektaryna nemese maldyń basyna emes, satqan ónimniń kólemine qaraı bergen tıimdi dep oılaımyn, – dedi Borıs Pavlovıch.
«Altynsarın» sharýashylyǵy oblys ortalyǵynan eń shalǵaı jatqan sharýashylyqtardyń biri. Qazir astyq óndirýdiń syrtynda 4 myń bas iri qara bordaqylaıdy. Aı saıyn tirideı salmaqta et satyp otyrady. Prezıdentpen áńgime barysynda B.Knıazev Memleket basshysynyń elimizde joldar salý týraly baǵdarlamasynyń júzege asyp, onyń tıimdiligin kórip otyrǵannyń biri óziniń sharýashylyǵy ekenine rızashylyǵyn bildirdi.
– «Nur Otan» partııasynyń keńeıtilgen májilisine jaqynda men de qatysqanmyn. Sonda Siz Qazaqstanda 4,5 myń shaqyrym joldyń salynǵanyn aıtqan bolatynsyz. «Altynsarın-Hromtaý» temir joly salynǵaly biz astyq pen et óndirisi kólemin eki ese arttyrdyq. Buryn biz elevatorǵa tapsyrý úshin astyqty 120 shaqyrymǵa tasıtynbyz. Sharýashylyq qazir astyqty tutynýshyǵa birden vagonmen artady, aradaǵy deldaldardan da qutyldyq. Aı saıyn Shymkentke 10 myń tonna bıdaı jiberemiz, basqa jaqqa da jiberý múmkindigimiz bar. Etti 350 shaqyrymda jatqan Qostanaı qalasyna aparatynbyz. Batys-Ortalyq tas joly tóselgeli suranys jasaýshylar etti ózderi kelip alyp ketedi. Sizdiń ekonomıkalyq daǵdarysqa qarsy baǵdarlamańyz aıasynda jasalǵan jumystar, ıaǵnı sapaly joldar túkpirde jatqan sharýashylyqty bar qıyndyqtan alyp shyqty, – dedi Borıs Pavlovıch.
Elbasy joldyń boıy qaınaǵan ómir ekenin aıtty. Joldar arqyly Qazaqstan Eýropaǵa, odan ári ózge qurlyqtarǵa shyǵatynyn, sonyń arqasynda óndirgen ónimniń arzandaıtyny, ekonomıkanyń damıtyny, básekege qabiletti bolatyny týraly áńgimeledi. Munan keıin Prezıdent aýyl sharýashylyǵynda ǵylymǵa júginýge keńes berdi.
– Almaty, Astana, Qostanaı qalasynda árqaısysynyń óz baǵyty bar agrarlyq iri úsh ýnıversıtet bar. Solardan ǵylym jańalyqtaryn talap etińizder. Ǵylym aralasqanda ǵana aýyl sharýashylyǵy qarqyndy damıtyn bolady. Jańa, tıimdi suryptar qýańshylyq jyldary da, tyńaıtqysh bolmaǵanda da dıqanǵa ónim beredi. Osyny eskerý kerek.
Názıra JÁRIMBET,
«Egemen Qazaqstan»
