«Negizi kapıtalǵa ınvestısııa 12,8 paıyzǵa ósip, 400,5 mlrd teńgeni qurady. Munda jeke ınvestısııa kólemi – 80 paıyz. Syrtqy ınvestısııalar 23,5 paıyzǵa artty. Elbasynyń bastamasymen qolǵa alynǵan memlekettik baǵdarlamalar ekonomıkanyń ósýine zor yqpal etti. Sonyń arqasynda turǵyn úı qurylysy tórt ese ósti. «Nurly jer» baǵdarlamasy boıynsha 1,8 myń páter salyndy, osy baǵdarlama negizinde bıyl 4,5 myń páter paıdalanýǵa beriledi jáne qoljetimdi baspana kólemi 1,5 esege artty. Jeke qurylys ta qarqyn alýda, eki jyl ishinde Qala qurylysy keńesi jalpy quny 1 trln teńge bolatyn 82 jobany bekitti», dedi B.Baıbek.
О́ńir basshysynyń aıtýynsha, ótken jylmen salystyrǵanda qalany abattandyrýǵa 2,3 ese, jol salýǵa 1,3 ese, ınjenerlik jelilerge 1,3 ese kóp qarjy bólingen. Naqtyly sharalardyń arqasynda qosymsha 43 myń jańa jumys orny ashylǵan, bul kórsetkish ótken jylmen salystyrǵanda 1,7 esege kóp.
«Bizdiń basty mindetimiz – qalada jaıly orta qalyptastyrý. Bıyl júıeli jańǵyrtý jumystaryn qolǵa aldyq, búgingi kúni batystyq standart boıynsha qalanyń tarıhı ortalyǵynyń úshten biri qaıta jasaldy. Qalalyqtardyń orasan qoldaýy arqasynda bul jumys odan ári jalǵasatyn bolady. Raıymbek, Dostyq, Abaı dańǵyldary men Esentaı ózeniniń boıy, ıaǵnı tarıhı ortalyqtyń taǵy da 178 ga jeri jańǵyrtylady. Bul shara qalaǵa biryńǵaı arhıtektýralyq kelbet berý úshin júrgizilýde. Biz jaıaý júrginshiler úshin sapaly ınfraqurylym jasaýdamyz ári zańsyz konstrýksııalar, vızýaldy kórinister alynyp tastalýda. Shyndyqqa júginsek, «keleńsiz ekonomıkamen» kúres júrýde», dedi megapolıs basshysy.
Sonymen qatar ol «Qorshaýsyz qala» baǵdarlamasy boıynsha 100 km qorshaý alynǵanyn, olardyń ornyna jasyl jelekter otyrǵyzylǵanyn jáne 28 km aryq jóndeýden ótkenin jetkizdi. Bul ótken jylmen salystyrǵanda úsh ese kóp, keler jyly 30 km aryq jóndeý josparlanǵanyn da aıta ketken jón. Qala basshysynyń sózine súıensek, qalada sońǵy eki jylda 732 aýla alańdary abattandyrylǵan. «Bul jumys odan ári jalǵasady.
«Meniń aýlamdaǵy sport» áleýmettik baǵdarlamasy aıasynda 6 myń bala 75 aýlalyq sport alańdarynda shynyǵýda. Eger burynǵy jyldary 180 lıft pen 229 kóppáterli turǵyn úıler ǵana jóndelse, al bıyl 199 lıft, 151 úı jańardy» dedi Baýyrjan Baıbek.
Adam ómiriniń arashasy atanǵan densaýlyq saqtaý salasy mamandarynyń da qyzmeti qyzý, qarqyny qaryshtap damýda. Qaladaǵy adamdardyń ómir súrý uzaqtyǵy 75,9 jas, bul – elimizdegi eń úzdik kórsetkish. Bıyl densaýlyq saqtaý salasyn qarjylandyrý 9,2 paıyzǵa artqan. Balalar ólimi 2,5 ese azaıyp, týberkýlez syrqatyna shaldyqqandardy ambýlatorııalyq emdeý 2 ese ósken, osy syrqattan qaıtys bolǵandar qatary 36 paıyzǵa tómendegenin de aıta ketken abzal. B.Baıbek 2,5 mlrd teńgeniń medısınalyq jabdyqtary alynǵanyn, jedel járdem parki 25 paıyzǵa jańarǵanyn, 40 jańa zamanaýı kólik alynǵanyn aıtyp ótti.
Bilim salasynda da birqatar sharýalar atqarylǵanyn basshynyń baıandamasynan ańǵardyq. Onyń sózinshe qala mektepteriniń fızıka, hımııa, bıologııa, lıngafon kabınetteri zamanaýı quraldarmen 100 paıyz jabdyqtalǵan. Mektepterdiń barlyǵy keń jolaqty ınternetpen tolyq qamtylǵan.
«Búgingi kúni qala turǵyndarynyń basym bóligi – 35 jasqa deıingi jastar, elimizdiń árbir 3-shi stýdenti Almatyda oqıdy, sondyqtan 2020 jylǵa deıingi jastardyń qalalyq jol kartasy jasaldy. Syrttan kelgen jastardy iskerlikke, erikti bolýǵa jáne basqa da kásipterge baýlıtyn Loft-ortalyq ashyldy. Qazirdiń ózinde 7,8 myń adam jumysqa turdy. 2,5 myń adamǵa tegin kásibı bilim berilýde. Qalada «Almaty jastary» atty jastardyń turǵyn úı baǵdarlamasy qolǵa alyndy, munda 35 jasqa deıingi jastar jeke páter alý úshin jeńildetilgen zaem ala alady. «Almaty» UK ÁKK» AQ jastar úshin jataqhana salatyn bolady. Bıyl biz «Rýhanı jańǵyrý» jobasy aıasynda 2000 oryndy 4 jataqhana salamyz. Keler jyly 2,4 myń oryndy taǵy da 2 jataqhana qurylysy bastalady», dedi ol.
Qala basshysy «Rýhanı jańǵyrý» baǵdarlamasyn júzege asyrýǵa aıryqsha nazar aýdarylǵanyn da tilge tıek etip, búgingi kúni quny 87 mlrd teńgeden astam qarjyǵa 125 joba qolǵa alynǵanyn alǵa tartty. Onyń sózinshe «Týǵan jer» jobasyna kásipkerler belsendi túrde aralasyp, áleýmettik nysandar salýda. Sonyń negizinde jeke qarjy esebinen Naýryzbaı aýdanynda 500 adamǵa arnalǵan emhana, 1,2 myń oryndyq mektep salynǵanyn, Alataý aýdanynda jeńil atletıka stadıony iske qosylǵanyn aıta ketsek deımiz. Bolashaqta halyqaralyq deńgeıdegi baqqa aınalatyn Almatynyń Botanıkalyq baǵyn jańǵyrtý jobasy qolǵa alynbaqshy.
Jıyn sońynda Baýyrjan Baıbek jýrnalısterdiń qoıǵan san túrli saýaldaryna jan-jaqty jaýap berdi.
Raýan QAIDAR,
«Egemen Qazaqstan»
