Satyp alýshy aýksıonǵa telefon arqyly qatysqan ári aty-jóniniń jarııalanbaýyn qalaǵan. Saýdalasý rásimi 20 mınýtqa jalǵasty. Shedevrdi baǵalaýda birden 100 mln dollardan bastalǵan. Mundaı qymbat baǵa retinde tirkelgen týyndy Pablo Pıkassonyń «Aljırlik áıelder» atty kartınasy eki jyl buryn 179 mln AQSh dollaryna satylǵan bolatyn.
1519 jyly dúnıeden ozǵan uly sýretshiniń artynda 20-ǵa jýyq eńbekteri qalǵan. 1505 jyldan keıin salynǵan dep sanalatyn atalǵan týyndysy jeke kolleksııada saqtalǵan birden-bir úzdik kartınasy. Kartınada Hrıstos ertedegi grekterdiń uzyn kóılegi hıton jamylǵan, kıim altynmen zerlengen. Zertteýshiler kartınanyń belgili bir ýaqyttarda Anglııa koroli I Karldyń menshiginde bolǵanyn aıtady.
Kartınanyń satylý tarıhy 1958 jyldan bastalady. Alǵash ret aýksıonda Da Vınchıdiń shákirtteriniń biriniń kartınasy dep tanylyp, 60 AQSh dollaryna baǵalanǵan. Tek 2005 jyly ǵana «joǵalǵan Leonardo» dep naryqta úlken qyzyǵýshylyq týdyrǵan bolatyn.
Aıa О́MIRTAI,
«Egemen Qazaqstan»
