Keńestiń jumysyna Din isteri jáne azamattyq qoǵam mınıstri Nurlan Ermekbaev, Ázerbaıjan Jastar jáne sport mınıstriniń orynbasary I.Babaev, Reseı Federasııasy Bilim jáne ǵylym mınıstrligi Balalardy jáne jastardy tárbıeleý salasyndaǵy memlekettik saıasat departamentiniń dırektory I.Mıheev, TMD-ǵa qatysýshy memleketterdiń jastar uıymdarynyń jetekshileri, Qazaqstandaǵy Armenııa, Belarýs, Tájikstan, Qyrǵyzstan memleketteri elshiliginiń ókilderi qatysty.
Jıyndy ashqan N.Ermekbaev jastardyń máselesi memlekettiń mańyzdy baǵyttarynyń biri ekenin atap ótti. Mınıstr Keńes qatysýshylaryn Memleket basshysynyń «Bolashaqqa baǵdar: rýhanı jańǵyrý» baǵdarlamalyq maqalasynyń negizgi baǵyttarymen tanystyryp, jastar arasynda dinı ekstremızm men radıkalızmniń aldyn alý boıynsha júrgizilip jatqan jumystar jaıynda áńgimeledi.
«Kezinde Shyǵys oıshyly Ábý Nasyr Ál-Farabı: «Jastaryńyzdy kórsetseńiz, men sizderdiń elderińizdiń bolashaǵyn aıtyp beremin» degen eken. Sondyqtan, bizdiń elder arasyndaǵy jastardyń ózara dostyq qarym-qatynasta bolýy qoǵamymyzdyń órkendeýdiń kepili. Qazirgi tańda jastar barlyq dástúrli dinderge jáne jalpyǵa ortaq qundylyqtarǵa aınalǵan rýhanı, moraldyq, etıkalyq prınsıpterdi durys túsinip, buǵan oń kózqaraspen qaraýy tıis. Biz jastardy bilim alyp, alǵa umtylýǵa, ortaǵasyrlyq dogmalar men qarańǵylyqtan aýlaq bolýǵa shaqyramyz», dedi N. Ermekbaev.
Sonymen qatar, jıyn barysynda XIX Dúnıejúzilik jastar jáne stýdentter festıvaliniń qorytyndysy, «TMD-ǵa arnalǵan 100 ıdeıa» halyqaralyq jobasyna daıyndyq sekildi birqatar kún tártibindegi máselelerdi talqylandy.
Keńes músheleri Qazaqstannyń patrıottyq jáne ekologııalyq tárbıeleý, eriktiler qozǵalysyn damytý jáne jastar resýrstyq ortalyqtarynyń qyzmetin uıymdastyrý boıynsha ozyq tájirıbesin atap ótti. Sondaı-aq, otyrys aıasynda «Jastar» ǵylymı-zertteý ortalyǵynyń qyzmeti tanystyryldy. Jıynǵa qatysýshylar elimizdiń Keńeske joǵary deńgeıde tóraǵalyq etkendigin atap ótip, Din isteri jáne azamattyq qoǵam mınıstrligine alǵystaryn bildirdi.
