Atalǵan sharanyń basty maqsaty – «Máńgilik El» jalpyulttyq ıdeıasynyń mán-maǵynasyn túsindirý, jas qazaqstandyqtardyń boıynda otanshyldyq sezimin oıatý jáne de sanany jańa sapaly deńgeıde jańǵyrtý. Onyń jumysyna Bilim jáne ǵylym mınıstrligi Y.Altynsarın atyndaǵy UBA ókilderi, Astana men Almaty qalasy jáne oblystyq bilim basqarmalarynyń jetekshileri, respýblıkalyq bilim berý mekemeleriniń basshylary, pán muǵalimderi, «Rýhanı jańǵyrý» baǵdarlamasynyń menedjerleri qatysty.
Otyrysty sóz sóılep ashqan «Baldáýren» respýblıkalyq oqý-saýyqtyrý ortalyǵynyń bas dırektory Muhıddın Tólepbaı ortalyq jumysyna keńinen toqtalyp ketti. Qazirgi tańda ortalyq jas býyndy patrıotızmge tárbıeleýge erekshe ekpin berip otyr. «Patrıotızm men azamattyqty tárbıeleý ıdeıasy qoǵamdyq jáne ulttyq mańyzy bar mindet bolyp tabylady. Negizgi maqsaty Otanǵa, týǵan jerine degen súıispenshilik sezimin tárbıeleý bolyp tabylatyn «Týǵan jer» patrıottyq baǵdarlamasy – biz úshin erekshe mańyzǵa ıe», dep atap ótti Muhıddın Bekbolatuly.
Jalpy, «Baldáýren» ROSO jylyna 5 myńnan asa bala qabyldaıtyn Qazaqstandaǵy jalǵyz oqý-saýyqtyrý ortalyǵy. Memleket basshysynyń tapsyrmasymen 2002 jyly qurylǵan Ortalyq 15 jyldan beri óskeleń urpaqqa patrıottyq tárbıe berý boıynsha úlken jumys atqaryp keledi. Bundaǵy eń mańyzdy oqıǵa 2016 jylǵy aqpan aıynda Jas qazaqstandyq patrıottar akademııasynyń qurylýy. Sodan bergi ýaqyt aralyǵynda elimiz óńirlerindegi 1358 balaǵa osyndaı qurmetti ataq berilip otyr. Bul rette ótken jyly ashylǵan «Baldáýren – Qapshaǵaı» fılıalynda kvota boıynsha 2 myńnan asa bala saýyqtyrylǵandyǵyn da ataı ketken oryndy.
Alqaly jıynda Eýrazııa ulttyq ýnıversıteti tarıh fakýltetiniń dekany Tilegen Sadyqov «Rýhanı jańǵyrý» – tabysty el bolýymyzdyń kepili» taqyrybynda oı qozǵady. «Elbasy ulttyq sanany jańǵyrtý maqsatynda birinshi ret ǵylymı aınalymǵa ulttyq kod degen túsinikti engizdi. Ulttyq kod degenimiz – siz ben bizdiń búgingi tirshiligimiz. Qazaqtyń álemdik deńgeıiniń kóterilgeni osy ulttyq kod arqyly kórinedi», dedi Tilegen Sadyquly.
Bilim jáne ǵylym mınıstrligi «Rýhanı jańǵyrý» baǵdarlamasy aıasynda júrgizip otyrǵan «Tárbıe jáne bilim» kishi baǵdarlamasynyń menedjeri Lada Baron sońǵy bes aıda sanany jańǵyrtý boıynsha elimizde qyrýar jumystar atqarylǵandyǵyna nazar aýdartty. Bilim mekemelerinde otansúıgishtik pen azamattyqqa tárbıeleý jumystaryn tilge tıek etken L.Baron qazirgi óskeleń urpaq boıyna «men elim úshin ne isteı alamyn?», degen qaǵıdany sińirý qajet ekendigin erekshe atady.
Jalpy, semınar jumysy pándik-tájirıbelik baǵytta órbidi. Talqylaý barysynda oqytý-tárbıe jumysynyń tıimdiligin arttyrýdyń tetikterin qalaı iske qosý kerektigi jónindegi máselelerdiń jaýaby saralandy. Al paneldik seksııalarda «Rýhanı jańǵyrý» baǵdarlamasynyń mańyzdy baǵyttaryn iske asyrý joldary qaralyp, únqatysý alańdarynda jan-jaqty talqylaý tezine aınaldy.
Asqar TURAPBAIULY,
«Egemen Qazaqstan»
Aqmola oblysy
