Turǵyndarǵa bul iste prokýrorlar men sala mamandarynyń keńesi jetispeı jatady. Qostanaıda ashylǵan Quqyq qorǵaý qyzmetteri ortalyǵy endi osyndaı qıynshylyqtardy artqa tastaıtyn bolady. Elimizdiń Bas prokýrorynyń bastamasymen ashylyp jatqan ortalyqtar azamattarǵa quqyq qorǵaý isinde jaqsy qolaılylyq týǵyzady. Bas prokýratýranyń Astanadaǵy ǵımaratynda ashylǵan osyndaı ortalyq óz jemisin berip otyr. Úsh aıdyń ishinde oǵan 2,5 myń adam kelip, quqyǵyn qorǵaýda kómek pen keńester alǵan. Sonymen qatar Aqtóbe, Qyzylorda qalalaryndaǵy Quqyq qorǵaý qyzmetteri ortalyqtaryna aı saıyn shamamen 200 adam keledi. Qazaqstandaǵy tórtinshi ortalyqtyń ashylý saltanatyna Bas prokýrordyń orynbasary Marat Ahmetjanov arnaıy kelip qatysty.
– Turǵyndardyń kabınetten kabınetke júgirip sendelmeı-aq, «bir tereze» ustanymymen bir jerden quqyqtyq qyzmet kómegine júginýine múmkindik týdy. Kelýshilerge notarıýs, advokat, medıator, salyq salasy qyzmetkerleriniń, psıholog mamandardyń kómegi kórsetiledi. Bul memlekettik jáne quqyq qorǵaý organdaryna azamattardyń senimin arttyrý bolyp tabylady. Budan bylaı qylmystyq prosester elektrondy sıfrlandyrylady da, azamattar osy aradan-aq kómek ala alatyn bolady, – dedi Marat Muratuly.
Ortalyqta kezekshi prokýrorlar azamattardyń áleýmettik-ekonomıkalyq aryzshaǵymdaryn, ákimshilik óndiris, sotqa deıingi tergeý men azamattyq jáne qylmystyq isterdiń sot barysy tergeýi máselelerin qaraıdy. Kez kelgen azamat aldyn ala jazylmaı-aq ortalyqqa kelip, qajetti zańdy keńesin alyp, aryz-shaǵymyn bere alady. Mamandar barlyq máseleniń keshikpeı, ýaqtyly sheshimin tabýǵa kómek kórsetedi, keńes berip, baǵyttaıdy. Quqyq qorǵaý qyzmetteri ortalyǵynda kezekshilik etken prokýrorlardyń jedel qajettilik úshin aımaqtyq prokýratýra men ózge de ókiletti organdardan aqparattar alýǵa qoljetimdiligi saqtalǵan.
Ortalyqtyń ashylýyna oblystyq ákimdik zor qoldaý bildirdi, ǵımaratty jóndep, jabdyqtaýǵa 13 mıllıon teńge qarjy jumsaldy. Oblys ákimi Arhımed Muhambetov jańa nysannyń quqyq qorǵaý qyzmetiniń barlyq salasy boıynsha turǵyndarǵa kómegi zor bolatynyna senimdi ekenin aıtty. О́ńir basshysy mundaı ortalyqtar oblystyń basqa da aýdan-qalalarynda ashylatynynan habardar etti. Qazir ol úshin ǵımarattardy jóndeý, basqa da daıyndyq jumystary júrip jatyr.
Ortalyq elektrondy kezek júıesimen qamtamasyz etilgen. Al ýaqyt joǵaltpaý úshin «Azamattarǵa arnalǵan úkimet» memlekettik korporasııasy usynatyn elektrondy formattaǵy qyzmet alýǵa da múmkindik bar. Kezekshi prokýrorlar aýmaqtyq bólimsheler men basqa da ókiletti organdardan negizgi qajetti aqparattardy jedel ala alady. Segiz kabınet kelýshilerge túrli quqyqtyq qyzmet kórsetedi. Oblys prokýrorynyń birinshi orynbasary Marat Ábishevtiń aıtýynsha, taıaý arada munda elimizdegi osyndaı ortalyqtar arasynda birinshi ret onlaın-rejim iske qosylatyn bolady.
Názıra JÁRIMBET,
«Egemen Qazaqstan»
QOSTANAI
Sýretti túsirgen
Baǵdat AHMETBEKOV
