Respýblıka saraıyna jınalǵan zııaly qaýym ókilderi men shahar jurtshylyǵy Astanamyzdyń asqaqtaýy jolynda aıbyndy eńbek etken tulǵalarǵa aıryqsha iltıpat kórsetti.
Osydan týra jıyrma jyl buryn dál osy jeltoqsan aıynda Elbasy Nursultan Nazarbaevtyń jarlyǵymen Táýelsiz elimizdiń jańa astanasyn arqa tórindegi Aqmolaǵa kóshirýge sheshim qabyldanǵan bolatyn. Araǵa az ýaqyt salyp jańa elordanyń ataýy Astana bolyp ózgertildi. Bul ıdeıa táı-táı basqan jas memleket úshin eń bir kúrdeli kezeń toqsanynshy jyldary týyndaǵan táýekeldi qadam bolǵanymen, bul sheshimniń ómirsheńdigin ýaqyt dáleldedi. Búginde sán-saltanaty jarasqan aıbyndy Astana Táýelsizdiktiń tól perzentine, búkil qazaq eliniń maqtanyshyna aınaldy. Jas Astananyń jan-jaqty damyǵan jasampaz qalaǵa aınalýyna jarqyn qadam jasaǵandardyń ishinde altyn tájin Alataýdan arqa tórine aqjoltaılap attandyrǵan Almatylyqtardyń eren eńbegi men arman tilegi jatyr. Bul jóninde shahar basshysy búgingi marapattaý rásiminde keńinen aıtty.
– Almatylyq – ǵylym, bilim, óner, sport qaıratkerleri, árıne, memlekettik qyzmetkerler alǵashqylardyń biri bolyp Astananyń irgesin qalady jáne barsha qazaqstandyqtarmen birge jas astananyń qalyptasýyna zor úles qosty. Biz sol úshin únemi maqtanamyz! Astanany kóshirý Eýrazııa júreginde jańa ári zamanaýı qalanyń paıda bolýyna yqpal etti, Almatyǵa jańa ómirlik lep ákeldi. Búgingi kúni Astana - qalyptasqan saıası ortalyq, jańǵyrý sımvoly jáne ózge óńirlerge úlgi. Elbasynyń asa zor halyqaralyq bedeliniń arqasynda munda EQYU-nyń, Islam yntymaqtastyǵy uıymdarynyń sammıtteri, Azııada ózara yntymaqtastyq jáne senim sharalary boıynsha Keńes, álemdik jáne dástúrli din basshylarynyń sezderi ótti. Astanada halyqaralyq EKSPO- 2017 kórmesiniń ótýi eleýli álemdik oqıǵa boldy. Ǵasyrlar túıiskende Qazaqstan astanasyn kóshirgen ári qalany «qoldan jasaǵan» alǵashqy memleketke aınaldy. Prezıdent aıtqandaı, «óte aýyr 1990-shy jyldary Astana bizdi qanattandyrdy, úmit otyn jaqty jáne úlken qıyndyqtardy jeńe bilýge úıretti» – deıdi Almaty qalasynyń ákimi Baýyrjan Baıbek.
«Astana – Ardaǵym» syılyǵy bilim men ǵylym, sáýlet pen qurylys, densaýlyq saqtaý, sport, óner, kınematografııa, jýrnalıstıka jáne ádebıet salalary boıynsha berildi. Úmitkerlerdi irikteý konkýrstyq komıssııanyń saıtynda ashyq daýys berý nátıjesi arqyly anyqtalǵan bolatyn.
Astananyń ǵylym salasynda damýyna qosqan úlesi úshin – Ortalyq memlekettik mýzeıdiń dırektory Nursan Álimbaı, Astananyń sport salasynda damýyna qosqan úlesi úshin - Týrızm men sporttyń burynǵy mınıstri Temirhan Dosmuhambetov, Astananyń densaýlyq saqtaý salasynda damýyna qosqan úlesi úshin – Almatydaǵy №1 perzenthananyń bas dárigeri Naýryzbaı Raqyshev, Astananyń bilim salasynda damýyna qosqan úlesi úshin - ǵalym, jazýshy Myrzataı Joldasbekov, Astananyń qurylys salasynda damýyna qosqan úlesi úshin - «Bazıs-A» qurylys koporasııasynyń basshysy Aleksandr Belovıch pen ınjener-qurylysshy Osman Shahanov, Astananyń sáýlet salasynda damýyna qosqan úlesi úshin – Qazaqstannyń sáýletshiler Odaǵynyń prezıdenti Aqmyrza Rústembekov, Astananyń ınnovasııa salasynda damýyna qosqan úlesi úshin - dáriger, ınfeksıonıst Qarlyǵash Ábdıeva,
Astananyń óner salasynda damýyna qosqan úlesi úshin – Kórkemóner akademııasynyń prezıdenti Amandos Aqanaev, músinshi Bolat Dosjanov jáne dızaıner Quralaı Nurqadilova, Astananyń ádebıet salasynda damýyna qosqan úlesi úshin – jazýshy jáne jýrnalıst Ramazan Dýman men aqyn Maraltaı Raıymbek, Astananyń aqparat salasynda damýyna qosqan úlesi úshin - «Aıqyn» gazetiniń bas redaktory Nurtóre Júsip, fotograf Maksım Zolotýhın jáne 31-shi arnanyń bas prodıýseri Nurjan Muhamedjanova, Astananyń kınematografııa salasynda damýyna qosqan úlesi úshin - rejısser Ermek Shynarbaev jáne akter Ádil Ahmetov, Astananyń mýzyka salasynda damýyna qosqan úlesi úshin - kompozıtor Marat Omarov jáne ánshi Naǵıma Esqalıevalar «Astana-Ardaǵym» syılyǵymen marapattaldy.
Keler jyl elordamyz úshin mereıli jyl. Osyǵan oraı Almatyda Astananyń 20 jyldyǵyn merekeleýge arnalǵan birqatar aýqymdy mádenı sharalar-konsertter, festıvalder, kórmeler ótedi dep josparlanýda.
Arman OKTIаBR,
«Egemen Qazaqstan»
ALMATY
