«Momentým» – biregeı bilim berý jobasy, ol Qazaqstanda Tel-Avıv ýnıversıtetindegi Dostar qaýymdastyǵynyń bastamasymen Nazarbaev Zııatkerlik mektepteriniń bazasynda atqaryldy. Úsh aı ishinde elordanyń Zııatkerlik jáne jalpy bilim berý mektepteriniń joǵary synyp oqýshylary ózdariniń bıznes-jobalaryn, venchýrlik qorlaryn jáne muqııat startaptyń qazirgi zamanǵy úlgisin qurý men ilgeriletý, ıaǵnı damytý joldaryn oqydy. Oqýshylardyń bıznes-oılaý qabiletterin qalyptastyrý, ınnovasııanyń ekojúıesin qurý, zııatkerlik jobalardy ekonomıkanyń naqty sektoryna engizý taqyryptarynda belgili mamandardyń sheberlik synyptary uıymdastyryldy. Olar: Tel-Avıv ýnıversıtetindegi Kásipkerlik ortalyqtyń negizin qalaýshy Elena Dones, Duco kompanııasynyń menedjeri Marına Sımbler, Tel-Avıv ýnıversıtetiniń professory, qazirgi flesh-kartalardyń qurastyrýshysy Semen Lısyn, tabysty álemdik startaptardyń negizin qalaýshy Igor Nýsınovıch, sondaı-aq qazaqstandyq jas kásipkerler – Arslan Darımov, Muhtar Qýanyshbaıuly, Baǵdat Ýapov jáne Dagar Daýletov. Bıznes ıdeıalardy alǵa jyljytý, bıznes-jobalardy ekonomıkanyń naqty sektoryna engizý máselelerine basa kóńil bólindi.
Oqýshylar ýorkshoptarda ázirlegen óz jobalaryn usynǵan ýaqyttan bastap «Momentým» aqıqatqa aınaldy. Bular – Qazaqstan boıynsha týrıstik marshrýttar qurý, bólmeishilik dekorotıvtik ósimdikterden energııa alý, belgili sheteldik zattardy jetkizý jáne olardy bizdiń elde ornatý, qýatty snekterdi jetkizý jáne satý, belgili sheteldik tátti taǵamdardy iske asyrý. Internette ınnovasııalyq ázirlemelerge arnalǵan úsh joba salynǵan – ınvesterler men startapshylardy biriktiretin onlaın-platforma, sondaı-aq ózin-ózi yntalandyrý men taım-menedjment boıynsha mobıldik qosymshalar.
Jas kásipkerlerdiń bıznes-jobalaryn Tel-Avıv ýnıversıtetindegi Dostar qaýymdastyǵynyń prezıdenti Aleksandr Mashkevıch óte joǵary baǵalady. Joba qatysýshylaryna beıneúndeý arqyly sálemdeme joldaǵan Aleksandr Antonovıch óz sózin bylaısha túıindedi:
– «Sizder osyndaı keremet el – Qazaqstanda ómir súrýdesizder, munda óskeleń urpaq úshin ózin-ózi damytýdyń barlyq múmkindigi bar. Kásipkerlik qyzmet tek syrttan ǵana ádemi ári ońaı bolyp kórinedi. Shyn máninde ol degenimiz tynymsyz eńbek, úlken táýekel, joǵary jaýapkershilik, múmkindikterdi tabý men iske asyrý tapqyrlyǵy. Men Nazarbaev Zııatkerlik mektepteriniń basshylyǵyna sizderge kásipkerlikti oqý jáne qabilettilikti qalyptastyrý úshin jasap jatqan qamqorshylyǵyna rızashylyǵymdy bildiremin. Búginde tórtinshi ónerkásip revolıýsııasy ǵasyrynda júzdegen kásipter joıylyp, júzdegen jańa kásipter paıda bolýda. Sizder Qazaqstannyń keleshegin, ekonomıkasyn, saıasaty men mádenıetin qalyptastyrýshylar retinde álemde bolyp jatqan ózgeristerge naqty ári jyldam ıkemdelip úırenýlerińiz qajet. Men sizderge úlken-úlken tabystar tileımin, sebebi Qazaqstannyń bolashaǵy – sizderdiń qoldaryńyzda».
Bilim jáne ǵylym mınıstrliginiń jaýapty hatshysy Aryn Orsarıev, Astana qalasy bilim basqarmasynyń basshysy Anýar Janǵozın, Tel-Avıv ýnıversıtetindegi Kásipkerlik qaýymdastyǵynyń vıse-prezıdenti Sanııa Arapova, Nazarbaev Zııatkerlik mektepterin damytý departamentiniń dırektory Juldyz Súleımenova, «Atameken» UKP adam kapıtalyn damytý departamentiniń dırektory Oljas Ordabaev, «Astana Innovations» AQ marketıng departamenti dırektorynyń orynbasary Jasulan Kenjeǵalıev jáne Rocket Study oqytý ortalyǵynyń negizin qalaýshy Arslan Darımov baıqaýǵa tórelik etip, joba jeńimpazdaryn anyqtady.
Zııatkerlik mektepterdiń Anel Bekjigit, Sanııa Muhanova, Bogdan Berlov jáne Ernar Nadyrbaev syndy oqýshylary baıqaý jeńimpazdary bolyp tanyldy.
Birinshi pılottyq satydaǵy jetistik halyqaralyq jobany odan ári damytý men aýqymyn arttyrý úshin qoldanylady. Tel-Avıv ýnıversıtetiniń Kásipkerlik ortalyǵymen qazaqstandyq oqýshylar úshin arnaıy ázirlengen barlyq metodıkalar Zııatkerlik mektepterge beriletin bolady. Astanada oqýdan ótken oqýshylar men oqytýshylar ızraıldik tehnologııa boıynsha startaptar salasynda trener bolady dep kútilýde.
«Momentým» aıasynda elimizdiń barlyq óńirlerindegi jalpy bilim berý mektepteriniń joǵary synyp oqýshylaryn startap ekojúıesi men negizgi kásipkerlik qabiletterin arttyrýǵa oqytý josparlanýda.
Dýman ANASh,
«Egemen Qazaqstan»
