О́ńirge sapary barysynda Premer-mınıstr Oljas Bektenov Saıram aýdany Aqbulaq aýylyndaǵy «Aq-Ata» bulaǵyn tazartý, abattandyrý is-sharasyna qatysty. Jalpy aýdany 3,5 gektar bolatyn, tarıhy XVII–XVIII ǵasyrlardan bastalatyn bulaq kózin tazartý, aınalasyn abattandyrý, aǵash kóshetterin otyrǵyzý jumystaryna atsalysty.
Aldaǵy ýaqytta «Qazgıdrogeologııa» ulttyq gıdrogeologııalyq qyzmeti bulaqtardy túgendeýge kirispekshi. Búginde 711 bulaq kózi anyqtaldy, sondaı-aq muraǵat materıaldaryna sáıkes, 2 772 bulaq kartasy jasaldy. Jalpy, ekologııalyq bastamalardy júzege asyrý sýdyń tabıǵı kózderin saqtaýǵa, halyqtyń ekologııalyq mádenıetin arttyrýǵa, sý resýrstaryna uqypty qaraýǵa baǵyttalǵan.
– Memlekettiń mindeti – adamnyń ómiri men densaýlyǵyna qolaıly qorshaǵan ortany qalyptastyrý. «Taza Qazaqstan» bastamasy qoǵam men memlekettiń kúsh-jigerin biriktire otyryp, jalpyulttyq qozǵalysqa aınaldy. Bul – nátıjeli, jasampaz patrıotızmniń aıqyn úlgisi. Aksııa tek senbiliktermen, aǵash egýmen shektelmeıdi. «Móldir bulaq» bastamasy tabıǵı bulaqtar men sý aıdyndaryn qamtı otyryp, sý resýrstaryn utymdy paıdalaný máselesiniń mańyzyn jalpy qoǵamdyq deńgeıge kóterip otyr, – dep atap ótti O.Bektenov.
«Móldir bulaq» ekologııalyq aksııasynyń birinshi kezeńinde atqarylatyn tazartý, abattandyrý jumystary elimizdiń alty óńirin – Túrkistan, Jambyl, Qyzylorda, Almaty, Jetisý oblystaryndaǵy, Shymkent qalasyndaǵy bulaqtardy qamtıdy. Ekinshi kezeń sáýir aıyna josparlanǵan, elimizdiń qalǵan óńirlerinde uıymdastyrylady.
«Móldir bulaq» aksııasy aıasynda ótken tazalyq jumysy barysynda óńirdiń barlyq aýdanynda bulaq kózi ashylyp, aınalasy kúl-qoqystan tazartyldy. Oblys kóleminde aksııa Túlkibas aýdanynda bastalyp, sharaǵa oblys ákimi Nuralhan Kósherov qatysty. Aýdanda 40-tan astam bulaq kózderi ashylyp, oǵan 3 myńnan astam aýyl ardagerleri men turǵyndary, jastar men belsendiler, mekeme qyzmetkerleri atsalysty. Búginde aýdannan 7 ózen bastaý alyp, eldi mekender mańyndaǵy 53 bulaq halyq ıgiligine qyzmet etip keledi.
Ordabasy aýdanyna qarasty Shubar aýyldyq okrýgindegi qasıetti «Kózdi ata» bulaǵynyń mańynda da aýqymdy tazalyq jumysy uıymdastyryldy. Aýdan aýmaǵynda 20-ǵa jýyq bulaq kózi bar. Bulaqtardyń barlyǵynda derlik tıisti mekeme qyzmetkerleri, abattandyrý salasynyń mamandary, aýyl turǵyndary men eriktiler birlese jumys atqaryp, bulaq kózderin ashý, aınalasyn qoqystan tazartý, retke keltirý jumysyn júrgizdi.
Igi bastama Qazyǵurt aýdanynda da joǵary deńgeıde uıymdastyryldy. Qazyǵurt taýynyń baýraıyndaǵy Atbulaq eldi mekeninde ótken ekologııalyq shara barysynda kıeli «Aqbýra áýlıe» bulaǵynyń aınalasy tolyq tazartylyp, abattandyryldy. Aýdan aýmaǵyndaǵy 10 bulaqtyń aınalasynda tazalyq jumystary júrgizilip, tal egý, ákteý, abattandyrý sharalary uıymdastyryldy.
Tólebı aýdanynda Áńgir-Ata aýylyndaǵy «Shilter áýlıe» bulaǵy, Maıbulaq aýylyndaǵy «Nur-Ata» bulaǵy, Qaınar aýylyndaǵy «Jylaq-Ata» bulaǵy, Kóksáıek aýylyndaǵy «Georgıı áýlıe» bulaǵy aýmaqtary tolyq tazartylyp, retke keltirildi. Ekologııalyq aksııaǵa aýdan ákimi Erkeǵalı Álimqulov jetekshilik etip, 30-ǵa jýyq zııaly qaýym ókili, 45 jumysshy, 70 erikti qatysty. Jumysty sapaly ári ýaqtyly oryndaýǵa 5 traktor, 3 «KamAZ» júk kóligi, 3 sý tasıtyn arnaıy tehnıka jumyldyryldy. Jalpy, aýdan aýmaǵynda
100-den astam bulaq kózi bar.
Shardara aýdanynda «Móldir bulaq» aksııasy Syrdarııa ózeniniń jaǵalaýynda ótkizildi. Ekologııalyq sharaǵa 500-den astam adam jumylyp, tabıǵatty qorǵaý, tazalyq jumysyna atsalysty. Sondaı-aq bul kúni Sozaq aýdanyndaǵy Asha taýynan bastaý alatyn, Jartytóbe aýylynyń aýmaǵyna deıingi 50-den asa bulaq kózi ashyldy.
Túrkistan oblysy
