Saltanatty sharada Qazaqstan halqy Assambleıasy Hatshylyǵy jetekshisiniń orynbasary Leonıd Prokopenko sóz sóılep, kitap týraly pikir bildirdi.
«Nursultan Nazarbaev Qazaqstan halqy Assambleıasynyń HHV sessııasynda birligimiz ben turaqtylyǵymyzdy saqtasaq, jarqyn bolashaq týraly úmitimizdiń úlken bolatynyn aıtyp edi. Men «Táýelsizdik dáýiri» kitabynyń óne boıynan osy oıdy kórdim», deı kele Leonıd Prokopenko kitapta beıbitshilik pen kelisim saıasatyn júzege asyrýǵa atsalysqan QHA-nyń memlekettegi áleýmettik-saıası prosesterdi turaqtandyrýshyǵa aınalǵany týraly jazylǵanyn aıtty. Onyń aıtýynsha, kitapta Qazaqstannyń jańǵyrý kezeńiniń úsheýinde de memlekettegi turaqtylyq pen birliktiń qalaı nyǵaıa túskeni aıtylǵan.
«Birinshi jańǵyrý kezeńinde QHA jańa konstıtýsııanyń qabyldanýy men Prezıdent quzyretin 2000 jyldyń 1 jeltoqsanyna deıin uzartý prosesterine qatysty. Osy kezeńde qoǵamdyq kelisimniń qazaqstandyq modeli, til men mádenıet salalaryndaǵy jalpyulttyq birlik qalyptasa bastady. Jańǵyrýdyń ekinshi kezeńinde Prezıdent Nursultan Nazarbaevtyń basshylyǵymen birlik pen kelisimniń qazaqstandyq biregeı modeli jasaldy. Ultaralyq qarym-qatynas nyǵaıa bastady. Bir aıta keterligi, bul prosesterdi júzege asyrý týraly Qazaqstan-2030 strategııasynda da aıtyldy. Sol kezderi Qazaqstan halqynyń birligi kúnin, Saıası repressııa men ashtyq qurbandaryn eske alý kúnin atap ótý qolǵa alyndy. Almatydaǵy alǵashqy Dostyq úıi ashyldy» , dedi QHA Hatshylyǵy jetekshisiniń orynbasary. Onyń aıtýynsha, 2000-2010 jyldary qoǵam ıntegrasııasy úshin taǵdyrsheshti oqıǵalar boldy. «2007 jyly Qazaqstan halyqtary assambleıasy Qazaqstan halqy Assambleıasy dep atala bastady. Konstıtýsııalyq statýsqa ıe boldy. Assambleıa týraly Zań qabyldandy. Memleket basshysy belgilep bergen ulttyq saıasattyń negizgi qaǵıdattary júzege asyryldy. Bul kezeńdi Prezıdent «Maqsattar men áreketter, aqyl men júrektiń birligi» dep atady», dedi Leonıd Prokopenko. Ol ekinshi jańǵyrý kezeńinde memleket basshysy Nursultan Nazarbaevtyń eńbegi nátıjesinde Qazaqstannyń birlik modeli BUU, EQYU, ShYU sekildi halyqaralyq ınstıtýttar deńgeıinde moıyndala bastaǵanyn atap ótti.
О́z sózinde QHA Hatshylyǵy jetekshisiniń orynbasary Leonıd Prokopenko Úshinshi jańǵyrý kezeńi týraly da aıtyp ótti. «Prezıdent qazaqstandyq patrıotızmniń bolmysy qandaı bolý kerektigin aıtqan. Ol - múmkindikterdiń teńdigi men memlekettiń taǵdyryna ortaq jaýapkershilik. Bul, ásirese, Qazaqstan-2050 strategııasynda jaqsy aıtylǵan», deı kele ol Prezıdent Nursultan Nazarbaevtyń birliktiń zamanaýı formýlasyn jasaǵanyn atap ótti. «Bir halyq - bir memleket - bir taǵdyr. Bul formýla «Máńgilik El» jalpyulttyq patrıottyq ıdeıasynda kórinis tapty. Taǵy bir aıta keterligi, QHA jyly Bes ınstıtýsıonaldy reformany júzege asyrýdyń alǵashqy jylymen tuspa-tus keldi. Memleket basshysynyń bastamasymen Alǵys kúni atap ótile bastady», degen Leonıd Prokopenko Elbasy kitabynyń basty ıdeıasy retinde álemniń bir orynda turmaıtynyn, birlik pen yntymaqtastyq únemi damýdy talap etetinin, naqty isterge kóshý kerektigin aıtty. Sonymen qatar ol «Táýelsizdik dáýiri» kitaby qoǵamdyq kelisim men jalpyulttyq birliktiń ensıklopedııasy ekenin aıtty.
Gúlnur Qýanyshbekqyzy,
«Egemen Qazaqstan»
