Memleket basshysy jıynǵa qatysýshylardy jáne Qazaqstan halqyn ulttyq merekemiz - Táýelsizdik kúnimen quttyqtady. «Bul kúni ýaqyt ólshemine baǵyna qoımaıtyn maqtanysh, qýanysh pen tolqynys ózara úılesim taýyp, erekshe sezimge bóleıdi», - dedi Qazaqstan Prezıdenti. Elbasy táýelsizdik jyldarynda Qazaqstan jyldam ósýge qol jetkizip qana qoımaı, aldaǵy ýaqytta ornyqty damý úshin berik negiz qalaǵanyn aıtty.
«Buǵan deıin tarıhymyzda bolmaǵan kásipkerler shoǵyry qalyptasty. 1,2 mıllıonnan astam qazaqstandyq óziniń jeke kásibin júrgizip, barlyq ulttyq kiristiń tórtten birin qamtamasyz etip otyr», - dedi Nursultan Nazarbaev. Memleket basshysy «Nurly jol» baǵdarlamasy keleshektiń ınfraqurylymdyq daıyndyǵyn qamtamasyz etken ári daǵdarysqa qarsy sheshim bolǵanyn atap ótti. «Yzǵarly jel soqqanda, biz qorshaý emes, jel dıirmender saldyq. 7 jyldyń ishinde óńdeý ónerkásibiniń jańa 24 sektory paıda boldy. Indýstrııalyq-ınnovasııalyq damý baǵdarlamasynyń tıimdiligi nysandar sanymen emes, tutas salalar sanymen ólshenedi», - dedi Elbasy.
Qazaqstan Prezıdenti memlekettiń áleýmettik fýnksııasyn nyǵaıtýdyń kepiline aınalǵan ekonomıkalyq ózgeristerdiń tabysty bolǵanyna erekshe nazar aýdardy. «Halqymyzdyń sany tarıhymyzda birinshi ret 18 mıllıonnan asty, bala týý kórsetkishi bir jarym ese ósti. Qazaqstan bıyl bastaýysh bilim berýdi qamtý aýqymy jóninen álem boıynsha tórtinshi orynǵa shyqty. О́mir súrý uzaqtyǵy 4,5 jylǵa ósip, 72,5 jasty qurady. 1,1 mıllıonnan astam otbasy baspanaly boldy», - dedi Qazaqstan Prezıdenti.
Nursultan Nazarbaev Qazaqstannyń halyqaralyq arenadaǵy jetistikterine jeke toqtaldy. «Elordamyzda halyqaralyq EKSPO kórmesi ótkizildi. Bıyldyń ózinde Qazaqstan dúnıe júzilik Ýnıversıadany, Shanhaı yntymaqtastyq uıymynyń tarıhı sammıtin, Islam yntymaqtastyǵy uıymynyń Ǵylym jáne tehnologııalar jónindegi birinshi sammıtin, Sırııadaǵy jaǵdaıdy beıbit retteýge arnalǵan kelissózderdi ótkizdi. Al 2018 jylǵy qańtar aıynda elimiz BUU Qaýipsizdik Keńesine tóraǵalyq etedi», - dedi Memleket basshysy.
Qazaqstan Prezıdenti «100 jańa esim» jobasyna qatysýshylarmen kezdesý ótkizgenine erekshe toqtalyp, Táýelsizdigimizdiń basty qundylyǵy azamattar ekenin atap ótti. «Bulardyń ustanatyn ómirlik qaǵıdasy - memleketten talap ete bermeı, oǵan óziniń ıdeıalaryn, shyǵarmashylyq energııasyn, qajyrly eńbegin arnaý. Mine, biz qol jetkizgen tabystyń naǵyz shynaıy manıfesi - osy! Táýelsizdiktiń urpaǵy da - osylar», - dedi Nursultan Nazarbaev.
Memleket basshysy ozyq damyǵan 30 eldiń qataryna qosylý úshin san jaǵynan ósýden sapalyq ózgeristerge kóshýdiń mańyzdy talap ekenin aıqyndap berdi. «Qazaqstandy qalyptasqan memleket retinde nyǵaıtyp, biz búkilin qamtıtyn jańǵyrýǵa, Táýelsiz Qazaqstannyń jańa turpatyn jasaýǵa kiristik. Sol úshin saıası, ekonomıkalyq jáne rýhanı jańǵyrý úderisin bastap kettik», - dedi Qazaqstan Prezıdenti.
Nursultan Nazarbaev «Rýhanı jańǵyrý» qoǵamdyq sanany jańǵyrtý baǵdarlamasyn iske asyrý máselesine toqtaldy. «Bıyl el bolyp Alashordanyń 100 jyldyǵyn atap óttik. Qazaq álipbıiniń latyn grafıkasyna ótýi jónindegi asa mańyzdy sheshim qabyldadyq. Latyn qarpine kóshýdiń tereń tarıhı logıkasy bar. Bul - ata-baba armanynyń oryndalýy ǵana emes, keler urpaqty bolashaqqa bastaıtyn jol», - dedi Memleket basshysy.
Sońynda Qazaqstan Prezıdenti qatysýshylardyń bárin Táýelsizdik kúnimen taǵy da quttyqtap, saıası turaqtylyq, qoǵam men halqymyzdyń birligi úshin júrgizilip jatqan saıasatqa tolyq qoldaý kórsetý elimizdiń tabysty bolýynyń basty kepili ekenin atap ótti. «Barlyq bastamalarymdy iske asyrýǵa kúsh bergen senimderińiz úshin, shynaıy qoldaýlaryńyz ben jankeshti kúsh-jigerlerińiz úshin barsha qazaqstandyqtarǵa alǵys aıtamyn», - dedi Nursultan Nazarbaev.
